طريقة عجينة السمبوسة والكلاج بمنتهى السهولة ملكة رمضان

المقادير

• كوب طحين
• 2 كوب ماء
• بيضة
• م.ص خل
• 2 م.ك نشا
• رشة ملح

الخطوات

السلام عليكم ورحمة الله وبركاته

ورقة السمبوسك بهاي الطريقة من انجح واحلى واسهل الطرق راااائعه فعلا وتستحق التجربة ، هشه جدا وخفيفة ومابتشرب زيت عالقلي وقرمشتها ما بتنوصف ، خلينا نشوف الطريقة

أولاً/ خليط العجينة

بنضرب كل المواد سوا بالخلاط لحتى ينتج خليط سائل اخف من خليط القطايف ، ممكن تحتاجي كمية مي اضافيه حسب نوع الطحين المهم ماتكون ثقيلة العجينة ولا خفيفة بالمرة وسط يعني.

ثانياً/ الصب والتسوية

بنشتغل فيها دغري

—اول شي بنسخن قلاية او صاج عالغاز وبندهنه مسحة زيت خفيفة جدا .

—بنبلش بالفرشايه ندهن الخليط عالقلاية السخنة ( بنوطي النار اثناء الدهن وبنرفعها بعد الدهن)

بنبلش بالدهن من الطرف الخارجي للقلاية لحد ما نوصل للوسط وبنسكر كل الفراغات وبدك تكوني سريعه بحركة الدهن لانه بنشف دغري وانتي بتدهني.

—بنعلي النار وبنتركها حوالي دقيقة بتنشف وبتبلش تفك لحالها عن الاطراف بتمسكيها بايدك بلطف وبتفكيها من القلاية.

—فورا بدك تدهنيها زيت ذرة وتغطيها ببلاستيك.

ملااحظة/

جهزي البلاستيك وصحن زيت وفرشايه قبل ما تبلشي بالشغل عشان يكونوا جاهزات .

—بتكملي بنفس الطريقة كامل الكمية.

ملااحظة/

كل ما تعملي وحدة بعدي القلاية عن النار لحتى تدهني الورقة زيت وتغطيها ، بتكون القلاية هديت شوي.

—كل 3 ورقات بترجعي تدهني القلاية زيت خفيف جدا.

ثالثاً/ الحشو والقلي

بنتج عندك ورقات شفافة خفيفة وطرية رائعه وشغلها ممتع.

—احسن طريقة للحشو طريقة الرولات البوريك .

—إذا بتحبي تعملي سمبوسك مثلثات بدك تكوني عامله الورقات كبااار عشان تتخلصي من الاطراف وتعمليها مستطيلات وتلفيها مثلثات.

—بتنقلى بزيت غزير وساخن.

رابعاً/ التفريز والاستخدامات

—لتفريزها بعد الحشو بترتبيها على صينية جنب بعض وبتفرزيها وثاني يوم بكونوا جمدوا بتخزنيهم باكياس بالفريزر.

—استخداماتها

للبوريك

للسمبوسك

للبقلاوة

للوربات

وكل استخدامات عجينة الكلاج تنطبق عليها.

—لازم تجربوها رااااائعه جدا جدا

وصحححتين وهنا