منسف اردني على الطريقة القديمة ملكة رمضان

المقادير

• لحمة كمية غير محددة
• جميد
• لبن قطيع جامد
• سمنة بلدية
• كركم
• ملح
• بصل وورق غار للسلق
• ارز
• للزينة:
• لوز

الخطوات

المنسف الأردني على الطريقة القديمة ملكة رمضان

السلام عليكم ورحمة الله وبركاته

عمري مافكرت انزل طريقة المنسف لانه كل الستات مبدعات فيه وكل وحدة الها طريقتها اللي بتحبها وبتعجبها وبتعجب اهل بيتها ، بس ولإني هالمرة عملته على طريقة قديمة طريقة امهاتنا وجداتنا القدام وباستخدام ادوات تراثية مثل القدور الالومنيوم الكبيرة القدر بيوسع ذبيحة وذبيحتين والغاز الارضي اللي طبعا كثااار ما بعرفوه يمكن جيل الثمانينات وتحت بعرفوه.

حبيت اقدمه وان شاء الله يعجبكم.

أولاً/ اللحمة

استخدمت لحمة قطع كبيرة لانه كان عزومة وزن القطعه حوالي 350 غم بنغسلها بمي على عدة مرات والتدقيق على موضوع شعر الغنم لانه بكون بده انتباه.

—بنسلق اللحمة بكمية وفيرة من المي وطبعا عالغاز الارضي ما بتطول اللحمة وبتستوي وبننتبه للزفرة وبنشيلها اول بأول ، وبعد ما تخلص الزفرة بنضيف راس بصل وورق غار عشان ريحة اللحمة.

ثانياً/ لبنية المنسف

الطريقة الأصلية بالجميد وانا بحب اخلط مع الجميد لبن قطيع اسمه هوه بكون جامد مش زي الرايب .

—للجميد بتنقعيه من قبل بيوم بعد ما تكسريه وثاني يوم بتكبي المي لانها كلها ملح ( مابكون فيها من لبن الجميد بكون لسا مش ذايب ) وبتحطي مي جديدة سخنة وبس تنزل حرارتها بتبلشي تدعكي فيه باليد رح يبلش يصير عندك سائل كثيف وناعم بتنزليه بجاط وبتستمري باضافة مي ودعك عشان تطلعي اللبن اللي هو اسمه (مريس).

—في ستات بطحنوا الجميد وبضريوه بالخلاط للصراحة ماعجبني بطلع محبحب ومابنعم لو شو ماعملتي.

—بنخلط الجميد المريس مع اللبن القطيع وبنغليه عالغاز وبما انه في لبن لازم تحريك مستمر عشان مايفرط ، بس لو كان جميد لحاله مابده تحريك مابفرط ابدا.

ثالثاً/ تسوية اللحمة باللبنية

بعد مرور ثلاث ارباع استواء اللحمة بنضيفلها على ميتها الجميد وبنتركه يغلي لحتى تستوي اللحمة تماما وبنضيف سمنة بلدية للي بحب وبنضبط الملح والكركم وسماكة الجميد إذا بده مي زيادة ضيفي مي مغليه.

رابعاً/ الرز

الرز معروف طريقته مارح اخوض فيها بس للمناسف في ناس بعملوه اصفر انا بحبه أبيض ماضفتله كركم.

خامساً/التقديم

بتتكلّف السدور بالتساوي وبينحط خبز شراك في السدر تحت الارز وشراك فوق اللحمة كمان بس ما ضفت لانه ابني عنده حساسية قمح.

—بتتزين المناسف بالصنوبر او اللوز والطريقة القديمة ما بتتزين بالبقدونس ، جديد البقدونس عالمنسف واحنا كمان ما بنحبه عالمنسف ، بس الك الخيار بالنسبة للزينة.

—بيتقدم جنب المنسف ورقيات مثل جرجير بصل اخضر وفجل ومخللات.

* بتمنى اكون عطيت هالطبخة الشعبية المفتخرة حقها وما اكون اجحفت في الشرح او طولت عليكم وصحة وهنا يارب.