افضل عجينة كنافة خشنة منزلية ولا أروع ملكة رمضان

المقادير

• كوب طحين
• نصف كوب نشا
• ربع كوب زيت ذرة
• رشة ملح
• كوب ماء

الخطوات

السلام عليكم ورحمة الله وبركاته

مين مابحب الكنافة وعجينة الكنافة وجبنة الكنافة ، حلو ما بنستغني عنه بأي مناسبة ولا بدون مناسبة حبيت اعمل عجينته بالبيت وحبيتها كثير ، خلينا نشوف الطريقة

أولاً/ عجينة الكنافة

بنخلط كل المواد بالخلاط لحتى نحصل على عجينة سائلة اكثر من عجينة القطايف .

ثانياً/ صب وتشكيل خيوط الكنافة

—بنفرغ العجينة بكيس فريزر وبنثقب الكيس ثقب صغير جدا بدبوس او عود خشب يكون رفيع.

—على صاج محمي او قلاية غير لاصقه ونار هاديه بنبدا نصب العجينة على شكل دوائر متصله ببعض على الصاج وبنتركها شوي بنلاقيها نشفت بنرفعها على جاط وبنغطيها بقماش.

* ملاحظة

لازم ما تخليها تطول عالغاز لانها بتنشف وبتتكسر.

—بنكمل كل الكمية بنفس الطريقة وعلى نار هاديه.

ثالثاً/ عمل الكنافة

—تشكلت معنا خيوط الكنافة بتكون طرية بنصب عليها سمنة وملعقة سكر بودرة وبنفركها فيهم مزبوط واذا بتحبي ضيفي صبغة برتقالي بس مش ضروري.

—بندهن صينية بسمنة او بنحط ورقة زبدة وبنفرد فيها طبقة من عجينة الكنافة وبنضغط عليها مزبوط وفوقها بنفرد طبقة جبنة عكاوي حلوة وبنضغطها برضه مزبوط.

—وعلى فرن محمي 200 بالرف الاول بنحطها بالفرن وبنفقدها بعد ربع ساعة نتأكد انه العجينة نشفت والجبنة ساحت ممكن تاخد وقت اكثر لانها طازجة العجينة.

ملااحظة/

اما بتعمليها صينية كبيرة او صواني ميني صغار على قد شخص او شخصين بس وهاد اللي انا عملته الطف حسيتها.

ثالثاً/ القطر والتقديم

بعد ما تطلع من الفرن بنقلبها بصينية ثانيه او طبق التقديم وهيه ساخنه بنصب عليهم القطر البارد ومايكون مرق كثير يعني قوام وسط. وبنزينها بالفستق الحلبي وبنقدمها.

رابعاً/ حفظ عجينة الكنافة

ممكن تتفرز العجينة عادي بكيس فريزر وبتدوم مدة طويلة.

واخييييييرا/

وصفة رائعه وسهله ومابدها وقت بالمرة بكفي انه انتي عامليتها بايدك ، بتمنى تجربوها ويتكون كنافه هوم ميد من اروع مايكون بتبيض الوجه وضيافه مفتخره وهدية للمغتربات بدول اجنبيه مافيها عجينة الكنافة.

وصحححتيين وهنا