طريقة عمل طباخ روحو طعم روعه ملكة رمضان
طريقة عمل طباخ روحو طعم روعه ملكة رمضان
المقادير
- دجاج
- كمية من البندوره الحمرا
- بكيت صلصة بندوره
- كميه من الكوسا الكبير
- راس ثوم مهروس
- معلقتين نعنع ناشف
- ملح
- معلقة سكر
- للتقديم أرز أبيض
الخطوات
السلام عليكم ..يسعد مساكم بكل خير
اليوم وصفتنا طيبه وزاكيه كثير وتغير عن الاكلات المعتاده وطعم جديد ..ما بعرف اذا الكل بعرفها بس هي مش من الطبخات المعتاده يلي بنطبخها كثير ..
وصفتنا لليوم ..طباخ روحه ..هههههه هيك اسمها وللاسف ما بعرف شو سبب هالتسميه بس يلا المهم الطعم ..وممكن نحكيلها صلصة الكوسا ..
ويلااا نشوف الطريقه سوا
ان شاء الله تنال أعجابكم وتجربوها
& بالبدايه بنبلش بالدجاج ..بنقليه وبعدين بنضيفله مي وبنسلقه وبضيفله راس بصل كامل عشان انشله بعد السلق
وهون السلق راح يكون عندي مو سوا تماما عشان يكمل سواه بالصلصه ..بعد ربع ساعه تقريبا من سلق الدجاج بضيفله التالي :
كمية من البندوره الحمرا المعصوره عالخلاط ومعها بكيت صلصة البندوره مخلوطين سوا وبضيفهم عالدجاج مع معلقة سكر ليعادل طعم الصلصه ..
والكوسا بقشره وبغسله وبقطعه قطع بين الكبيره والوسط عشان ما يذوب بالصلصه عشان هيك ما بنفضله يكون صغير ..وبضيفه للدجاج
وخليهم يغلو ويتسبكو سواا
& الان لسر النكهه الخطيره ..وهي بهرس راس ثوم او حسب الرغبه الكميه وبضيفله معلقتين كبار نعنع نااشف وبخلطهم سوا وبضيفهم عالصلصه ..وبتركها تتسبك لحتى تثقل معي ويصير قوامها ممتاز بطفي تحتها وما ننسى انضيفلها الملح
وممكن اضافة صلصة البندوره حسب الحاجه وحسب ما بتحبو ثقلها
وهيك وصفتنا صارت جاهزه ..سهله وطيبببه كتير
جربوها ما راح تندمو ..وضيفوها لقائمة فطور رمضان لانه مرات بنوصل لمرحله بنخلص كل الطبخات وبنرجع نكرر فيهم ..
& وطبعا تقدم مع الارز الابيض ..
وصحه وعافيه مقدما ..
