كبه بلبنيه بتشهي ملكة رمضان

المقادير

• للكبة:
• كيلو برغل
• نص كيلو هبرة ( لحمة بدون دهن)
• معلقة كبيرة ملح
• بصلتين كبار
• مي حسب الحاجة للبرغل
• للبنية:
• كاسة كبيرة رز
• لبن (زبادي) 2كيلو
• لتر مي
• بيضة
• راس توم
• لحمة ناعمة او شقف حسب الموجود
• معلقتين كبار نعناع يابس
• معلقتين سمنة
• ملح
• لحشوة الكبة:
• نص كيلو لحمة
• بصلتين كبار
• ملح
• فلفل اسود
• جوز وفستق مكسر ناعم نوعا ما

الخطوات

يسعدلي كل اوقاتكن ياغاليين اللبنية هيه اكلة حلبية اكتر الاوقات بتتقدم جنبا كبة اما قلب الطير او كبة مدعبلة او برغل بشعيرية *حبيت اقدملكن ياها مع الكبة عالاصول وبتمنى تعجبكن يلا نبلش

*بسم الله الرحمن الرحيم*

طريقة الكبة

اول شي جبت البرغل وبللتو بالمي لينفش البرغل بس نفش حطيت عليه الهبرة والملح والبصل درتو عالماكينة دورين وكل مااحتاجت مي حطيت لتكون عجينة طرية بس مو كتير يعني معقولة تركتا ترتاح

الحشوة

قليت اللحمة مع البصل لاستوت نزلت عليها الملح والفلفل و المكسرات الي متوفرة وتركتا تبرد

جبت الكبة بعد مادرتا قطعتا قطع قد حجم حبة الجوز وشكلتا قراص متل الكبة المقلية بس حجم صغير لحتى تكون قد اللقمة طبعآ طريقة الكبة المقلية موجودة بملفي كملت هيك كل القطع لخلصت الكمية

طريقة السلق

جبت مي حطيتا عالغاز مع رشة ملح وتركتا تغلي نزلت بقلبا قراص الكبة والمي عم تغلي اذا كانت المي باردة بتفرط الكبة انتبهو الله يرضا عليكم ههههه بس طافت الكبة او صارت عالوجه معناها استوت بطالعا وبحطا بصينية بحاول اصفيا منيح من المي هيك بتكون الكبة خلصت

طريقة اللبنية

غسلت كاسة الرز منيح

جبت اللبن وحطيت عليه البيضة البيضة مشان اللبن مايفرط في ناس بيحطو نشا او طحين بصراحة انا حبيت البيض اكتر طبعا مالو طعمة ابدن اي حركتن كتير منيح ضفت مي عاللبن لازم مايكون لاسميك ولا خفيف يعني مقبول اخد معي لتر مي بس اللبن عندي دسم طبعا بحلب مناخد مي اللحمة المسلوقة ومنضيفا بس جوزي وولادي مابحبو اللحمة المسلوقة بلبنية مهم حطيتا عالغاز وتميت احرك فيا لوقت بلش يغلي اللبن نزلت عليه الرز وتركتن يغلو لوقت يستوي الرز بس تعقد اللبن واستوا الرز بحط بطواي السمنة واللحمة وبقليا بنزل عليها التوم والنعناع والملح ورشة فلفل اسود وبقلين بنزل عاللبنية وبتركن كم دقيقة يغلو وياخد طعمة بعض ودوقو واستمتعو بالطعمة

للتقديم

بسكب اللبنية وبنزل عليها حبات الكبة وجنبا فليفلة خضرا ونعناع اخضر ولا أطيب

وهي كانت وصفتي لليوم ان شاءالله تكون عجبتكن

بتمني تجربوا وتعطوني رئيكن صح بدا شغل بس اكلة بتستاهل

والف صحة وهنا

بحبكككككككن انااااااا