طريقة اصابع زينب بطريقة رائعة حلو رمضاني لا غنى عنو ملكة رمضان
طريقة اصابع زينب بطريقة رائعة حلو رمضاني لا غنى عنو ملكة رمضان
طريقة اصابع زينب بطريقة رائعة حلو رمضاني لا غنى عنو ملكة رمضان
المقادير
- 500 غ طحين حوالي 3 كوب وثلث
- كوب حليب
- نصف كوب زيت نباتي
- ثلاث أرباع كوب سميد ناااااااعم كتير حصرا
- ملعقة كبيرة خميرة
- ملعقة كبيرة سكر
- ربع ملعقة صغيرة ملح
- قطر تقيل بارد عبارة عن:
- كوبين سكر
- كوب ماء
- عصرة ليمون
الخطوات
☆بسم الله الرحمن الرحيم☆
عنجد انا مستغربة ومو فهمانة ليش يسمو هالأكلة أصابع زينب
يعني والله أكلة كيوت ولذيذة بس من ورا اسمها حسيت حالي زومبي أو شي مجرمة عم تنقرش أصابع
هاتو اخترعولي اسم تاني يرضى عليكن قال أصابع زينب قال
بعدين مين هي زينب اللي أصابعها كاروهات ههههههههه
فوتو فوتو عالمطبخ نشتغل حاجة ضحك الكروش عم تستنى التحلاية ههههه
المهم يا حبوبات
أول شي مننخل الطحين ومنحط معو السميد ومنضيف عليهم الزيت ومنخلطهم سوا منيح ليترطب الطحين والسميد بالزيت بعدين منضيف الخميرة مع السكر والملح ومنخلطهم معهم وبعدا منضيف الحليب بالتدرييييج احتياطا لنوع الطحين المهم نوصل لعجينة متماسكة لا لينة زيادة ولا يابسة ومنتركها ترتاح حوالي ربع ساعة أو نص ساعة ومنشكلها بقى على مصفاية وبصراحة انا ماعندي هديك المصفاية الخشنة المشهورة حبيبة الملايين فاستخدمت الناعمة وحبيتا كتير
المهم منشكلهم ومنرتبهم بصينية ومنترك بيناتهم فراغات لأنو رح يختمرو وينفشو متل مابتنفشو بعد الفطور هههههه
بس نخلص منغطيهم ومنتركهم يرتاحو حوالي ربع ساعة أو نص ساعة كمان ومنحمي الزيت بس يكون حامي متوسط يعني مو تسخنوه كتير لحتى ماتحترق من برا بسرعة ومن جوا ماتستوي
المهم منحط كم حبة بالمقلاية ومنحسب حساب انها رح تنفش شوي فلا تعبوها زيادة ومنبلش نقلب لحتى ناخد لون التحمير المتساوي وبس يصيرو جاهزين منطالعهم على مصفاية وبعدها مننزلهم بقطر بااااارد وتقيل منكون مجهزينو قبل بوقت
واستمتعو بالجماااال واللذاذة وعفكرة تاني يوم هالأكلة أطيب وبتضل قرشتها بتجنننن
اي حدا داقها كيف عليها فكيفو معنا انتو كمان هههههههه
عنجد جربوها ودعولي بالبركة ورح تحبوها ان شاء الله
تسنيم خانم انبسطي هي عم اكتبلك الوصفة وانا مصحصحة ورايقة وبكامل قواي العقلية ههههههه
بحبكم كتير وماتنسونا من صالح دعائكم♡
