معمول التمر بالطحين سهل وسريع ولزيز ومضمون

المقادير

• كيلو طحين او 5 كاسات
• كاسه سمنه ذايبه مو سخنه
• كاسه زبده بحراره الغرفه
• معلقتين سمن بلدي وممكن نستغني عنه بمعلقتين سمن عادي للي ما بحب نكهه السمن البلدي
• رشه ملح
• كوب سكر مطحون ناعم
• كوب الا ربع ماء دافى مذاب فيه 4 ملاعق حليب بودره واذا بدك تحتفظي بالمعمول فتره طويله ما تحطيه بخرب طعم المعمول للمدى البعيد
• معلقه ماء ورد
• للحشوه:
• تمر مطحون ومعجون
• بمعلقتين سمسم
• معلقتين حبه البركه
• معلقتين كمون اما مطحون او حب
• معلقتين يانسون
• بمعلقتين زيت زيتون
• ملقهتين زبده

الخطوات

للحشوه تمر مطحون ومعجون بمعلقتين سمسم ومعلقتين حبه البركه ومعلقتين كمون اما مطحون او حب ومعلقتين يانسون بنعجنهم بمعلقتين زيت زيتون وملقهتين زبده وبنكورهم وبنخليهم لوقت ما نحتاجهم

بنحط الطحين بوعاء كبير شوي ليوسع كل المواد

وبنحطله السمنه المذابه والزبده والسمن البلدي

وبنبسهم باطراف الاصابع وبنتركهم ساعه لساعتين يتشرب الطحين كميه الزيوت

بعد هيك بنضيف السكر والماء المذاب فيه الحليب ومعلقه ماء الورد

وبنبلش نلم العجينه فرك مو عجن لحتى تتكون عجينه طريه وملساء ومتجانسه

ما بدنا نبالغ بالعجن مشان المعمول ما يبس

رح تتكون عجينه طريه نوعا ما ما تخافي هي لحالها بترجع تلم وتشتد بس اغلبك حطيها بالثلاجه نص ساعه زمن

هلا ممكن نضيف خميره او بيكنج باودر بس انا بوصفه الطحين ما بفضلها

بتشيل رسمه المعمول بسرعه وبتنفش الحبه زياده

بعد نص ساعه رح تلاقي العجينه لمت وصارت جامده

قطعيها قد حبه الجوز واحشيها كرات التمر الشهيه

وشكليها وخليها ترتاح بالصنيه عشر دقايق قبل الشوي

وع فرن محمى مسبقا ع الرف الي تحت الوسط وع درجه حراره 180 اخبزيها عشر دقايق

ما بدنا تحترق ضلي راقبيها

بعد هيك حمري وجها تحمير خفيف

* ملاحظه خلي المعمول بالصنيه ليبرد شوي مشان ما يفتت

وبعدين انقليه لفوطه نظيفه وغطيه بفوطه ثانيه لحتى يبرد تماما

بعدها بتحطيه بحافظات محكمه

هلا كمان شغله رح تواجهك ممكن انه المعمول بمسك بالقالب

ما تتلبكي رشه طحين بالقالب بتكفي وبتوفي

صحتين وعافيه مقدما وان شاء الله بتجربوها وبتدعولي