كيكة هيلو كيتي بأسهل طريقة
كيكة هيلو كيتي بأسهل طريقة
المقادير
- مقدار الكيك:
- ٣ بيضات
- كاسة ونص سكر
- نص كاسة زيت
- ٣ كاسات طحين
- كاسة ونص حليب
- ظرفين بيكنج باودر
- ٣ معالق كاكاو خام
- ظرف فانيلا
- رشة ملح
- ٣ نقط خل تفاح او اي خل
- للكريمة:
- ٤ ظروف كريمة حليب
- معلقة كاكاو
- ظرف كريمة ع فراولة او كريمة بيضا مع ملون احمر
- شوكلا دهن
الخطوات
يسعدلي كل اوقاتكن وكل عام وانتو بألف خير اشتقتلكن قد كلشي حلو بهالدنيا وبعرف طولت الغيبة بسبب قلة الفضا برمضان والعيد
عيد ميلاد بنتي اليوم وحبيت افاجئة بهالكيكة الحلوة وبنفس الوقت بسيطة ويلا لحتى نشوف الطريقة
&بسم الله الرحمن الرحيم&
طريقة الكيكة موجودة بملفي هل المقدار عمل قالب كيك وسط
اول شي شغلت الفرن لحتى يحما لاجهز خليط الكيك خفقت البيض والسكر والزيت لحتى داب السكر ضفت عليهن الحليب والطحين والكاكاو والفانيلا وخلطت منيح اخر شي حطيت بكنج باودر ورشة الملح والخل وخلطتن تحريك بس مو خفق دخلتا فرن حرارة وسط اخدت معي تقريبا تلات ارباع ساعة وكل واحد حسب الفرن انا عملت الكيكة قبل بيوم تركتا ترتاح مشان وقت التقطيع ماتفتفت معنا *
جهزت الكريمة خفقتا مع حليب لوقت صارت كريمة سميكة انا اخدت معي ٤ ظروف كريمة حليب وظرف كريمة فراولة
طالعت الكيكة من الصينية وقصيت ورقة شكل هيلو كاتي وحطيتا فوق الكيكة وصرت بسكين كبير اقطع الرسمة بس اترك سانتي واقط مشان تعديل الرسمة في مابعد بعد ماخلصت تقطيع شلت الورقة وصرت شوف اذا في مكان بدو تظبيط وارجع ظبطو خلصت التقطيع وجبت خيط قصيت الكيك بالنص وحشيتو شوكلا دهن مشان يلزقو الطبقات منيح في بعض وبنفس الوقت طعمة اي رجعت حطيت الطبقة التانية ودهنتا بشي بسيط من الكريمة البيضا ودخلتا الفريزة عشر دقايق بهالوقت جبت ورقة زبدة قصيتا شكل ببيونة للهيلو كاتي وحطيتا فوق الكيك الزايد وقصيت منو ببيونة دهنتا بطبقة خفيفة من الكريمة وحطيتا عالكيكة اخدت تلات معالق من الكريمة وحطيت عليهن معلقة الكاكاو لحتى اعمل العيون والفم والخطوط حطيتا بكيس نايلو ليسهل عمل الشغل بشكل متقن
طالعت الكيكة من الفريزة وصرت اعمل دوائر للعيون وعملت الفم وعملت خطوط وخططت الببيونة بالخطوط رفيعة من كريمة الشوكلا والفم عملت شكل بيضوي وعبيت قلبو صوص فراولة او اذا مو موجود حطي كريمة فراولة
جبت الكريمة الفراولة بعد ماخفقتا منيح حطيتا بكيس نايلو وعبيت قلب الببيونة بضغط عالكيس كتير صغير لحتى عبيت كل الببيونة
هلق خلصت تخطيط وبلش الشغل جبت الكريمة البيضا حطيتا بقالب وحطيت شكل النجمة وصرت عبي بقية الكيكة بنجوم صغار لخلصت كل الكيكة من فوق والجنب كمان رجعت دخلتا للفريزة عشر دقايق لتمسك اكتر بعد مابردت طالعتا وصرت اعدل عليها اذا في شي اخطاء
وهي كانت كيكتي لليوم بتمنى من كل قلبي تكون عجبتكن متل ماعجبت بنتي وطار عقلا فيا بتمنى تجربوا وتفرحو اولادكن فيا وتعطوني رئيكن
والف صحة وهنا
