اغفري لي بقلم هلا غرابلي

اغفري لي …..

كنت مفكرة حالي انسانة عوضتني الحياة و اعطتني كل شي بدي اياه بيت و رجال و اولاد كل وحدة بتحلم فين و هدوء و استقرار و محبة اساس كل بيت سعيد بس ب لحظة انهار كل شي و انا انهرت معه حسيت حالي عايشة بكذبة كبيرة و بكابوس ما عم يخلص بدات قصتي لما حكتني جارتي رغد و قلتلي انزلي لحالك بدي احكي معك بموضوع و كان من صوتها مبين الموضوع جدي و ما كويس ابدا نزلت و شفتها متلبكة بلشت حكيها بانو ما عارفة من وين بدها تبلش قلتلها ادخلي بالموضوع فورا لانك وترتيني قلتلي مبارح المسا زوجي شاف زوجك داخل على بناية و معاه وحدة كان حاضنها و مبينة من طريقة لبسها انها وحدة ما مزبوطة و انا لو ما بحبك و بعتبرك متل اختي ما كنت بخبرك انا للحظة فتل راسي و قلتلا انت اكيد مخربطة انا زوجي مبارح كان سهران مع رفقاته و زوجي ما عنده هيك قصص زوجي بخاف الله زوجي بحبني و بحب بيته و اولاده قالتلي انشالله كون مخربطة قلتلها اوصفيلي شكل البنت منيح و اعطتني مواصفاتها و مكان البناية يلي فات عليها زوجي و شربت قهوتي و طلعت و انا عم فكر و انكر بيني و بين حالي انو معقول يكون هو فادي بقيت طول نهاري فكري مشغول و اعصابي تعبانة و رجع على البيت و ما بينت ابدا انو معي خبر بهيك قصة لتاني يوم قررت روح راقبه بالسهرة و حطيت اولادي عند جارتي و خبرتا انو رايحة راقب زوجي و بعد ما نزل بالسهرة نزلت وراه و اخدت تكسي و سبقته على عنوان البناية يلي اعطتني اياها جارتي و وقفت بعيد و عم راقب الفايت و الطالع على البناية و نطرت ساعة لدرجة مليت و اقتنعت انو ظالمة زوجي بهيك تفكير و فكرت ارجع على بيتي قبل ما المح سيارة زوجي عم تصف و ينزل و معه بنت غير مواصفات البنت يلي حكتلي عنها جارتي و فات عالبناية و لافف البنت من خصرها و عم يضحكو الاتنين انا وقت شفت هالمنظر حسيت حالي رح اوقع بالارض و رجلي ما بقا حملوني و بلش نظري يغبش هديت حالي عالحيط و مشيت بس للاقي محل اقعد فيه قبل ما اوقع بالارض …كان في سوبر ماركت قريبة كتير فتت عليها و فورا شافني الشب انو وجهي مصفر ودايخة ركض علي و هداني و اقعدني على كرسي و جبلي مي شربت و غسلت وجهي لصحصحت ….بعد ما رجعلي تركيزي شوي و شكرته للشب يلي ساعدني سالته انت من اهل المنطقة قلي ايه قلتلو بدي اسالك عن صاحب هالسيارة يلي مصفوفة هنيك هيدا كاني جاركن و ساكن بالبناية يلي قبالكن قلي اي هيدا بشوفه كل يومين بيجي لهون عنده شقة بالبناية بصف سيارته و بيطلع شغلة ساعتين و بيرجع بينزل و ما جبلي سيرة البنات يلي عم يجو معه و لا انا سالته لانو القصة صارت واضحة قمت من عنده و اخدت تكسي و رجعت عالبيت و طول الطريق و انا عم ابكي و طلعت على بيتي بدون ما مر حتى على جارتي لجيب اولادي فتت على البيت يلي كنت مفكرة انه بيت مبني من عواميد الصدق و الحب و الاخلاص و العشرة …..اول ما فتت على بيتي صابتني حالة هستيرية بلشت صرخ و كسر كل شي بيطلع بوجهي لدرجة كان نفسي احرق هالبيت متل قلبي يلي حرقه و هد حيطانه متل ما هد كياني …..طلعت جارتي على صوت الصراخ و التكسير و اول ما شافتني بهالحالة عرفت انو اتاكدت انو هيدا زوجي قربت علي و حضنتني و قلتلي طولي بالك كل شي اله حل انا صرت ابكي … حل !!!اي حل مع هيك رجال!!! لا رادع اخلاقي و لاديني عنده قلتلها مستحيل ابقى عنده بدي اطلق قلتلي تطلقي ؟؟!وين بدك تطلقي و تروحي عند اهلك و انت ما عندك سند بعد ما ابوكي توفى و زوجك هو يلي بيصرف على اهلك حتى ادوية امك القلب منه و قسط اختك الجامعي منه و اجار بيت اهلك منه كيف بدك تعيشي و تعيشي اهلك ؟؟!كلامها زاد حالتي سوء معناتها ما عندي حل الا انه حط كرامتي و قلبي و حياتي تحت رجلي وادعس علين حتى ما اتبهدل انا و اهلي و انزت بالشارع و حتى بدون اولادي يلي متاكدة انو هو رح ياخدن مني …….انهارت اعصابي و وقعت بالارض و اخر شي سمعته هديك الليلة صوت الدكتور و هو عم يقول رح اعطيها ابرة مهدئ اعصاب رح تهدى و تنام و تفيق احسن انشالله و رح اكتبلها على ادوية تستمر علين شهرين لتطلع من حالة الانهيار العصبي و نمت و ما حسيت على شي ….فقت تاني يوم وكان بيتي و لا كانو فيه اية اثار لحالة تكسير و جنون و هستيرية كانت قبل بيوم حتى فكرت حالي عم احلم و هالشي بيرجع لجارتي يلي لمت كل شي و رجعت البيت على حالته الطبيعية و خبرت زوجي يلي رجع من سهراته الغرامية انو انا تعبانة و لازمني راحة و طمنته انو هي ما رح تتركني و ضل تستفقدني كل ساعة و ما خبرته ابدا عن الشي يلي عرفته و الحالة يلي صابتني …..

كانت حالتي سيئة جدا رغم اني كنت هادية من برا لكن من جوا كنت عم بموت و انا عم اتخيل زوجي كل مرة مع بنت شكل بشقة اشتراها ليمارس وساخته و قذارته و انا هون قاعدة ببيتي و مستورة و صاينة اسمه و سمعته و اولاده بقيت اسبوع على هاي الحالة من الاكتئاب الحاد مع استمراري على الادوية النفسية المهدئة يلي كتبلي اياها الدكتور و يلي زاد وضعي سوء اكتر وقت فتحت موبايله هو و نايم وكان مقفول على بصمة ايده و قرات رسائل الواتس مع رفيقه يلي لا يقل وساخة و قذارة عنه و كان محتوى الرسائل كلام وسخ كتير و تباهي بممارساتن الجنسية مع عاهرات و من هالكلام (لو بتشوف شو كانت عاملة تاتو بسفل ضهرها و لو بتشوف شو عملتلي و سوتلي و على في وحدة ضرب بدي عرفك عليها هاي اقوى من الكل )كلام و حكي كتير عملي لعيان نفس و استفراغ و اكتئاب و معاناة قبل ما بلش بخطتي يلي خلته يركع و يسجد لربه ويطلب المغفرة و السماح من ربه و مني انا يلي ما رحمته و لا شفقت عليه ولا للحظة…….يتبع

ملاحظة:ممكن هاي القصة تلاقي انتقاد كبير من االعضوات بالجزء التاني و يقولو انو الحل الانسب لهيك حالة الطلاق حتى الرجال ما ينقل امراض لمرته بدي بس تركزه على ظروف بطلة القصة الصعبة كتيررر و ما تنتقده تصرفها القادم لانو انما الاعمال بالنيات .

الجزء التاني: اغفر لي

دقيت لاختي و قلتلها انت مرة كنت تاخدي دواء ليزيد وزنك و بتذكر انك وقفتيه لدوا لانو عملك تعب و ارهاق و نعاس و تقرحات فموية قلتلي اي صح شو بدك فيه ما كويس ابدا تعبني كتير قلتلها بعرف بس جارتي بدها تزيد وزنها و دكتورة وصفتلا على دواء حسيت بيشبه يلي كنت تاخديه لهيك قلت اسالك قبل ما تبلش فيه و يصير معها نفس ما صار معك و قلتلي اسمه ……نزلت عالصيدلية و اشتريت علبتين منه و نصحتني صيدلية بنوع افضل لزيادة الوزن لانو هالدواء اعراضه الجانبية كتيرة و متعبة مع انه اله فائدة بزيادة الوزن عالمدى البعيد ….

خلال فترة الاسبوعين ما خليت زوجي يقرب علي ابدا ما بس لانه هالشي جزء من الخطة بس لانه كمان ما كنت طايقة ريحته و لا حتى نفسه و ما كتير رح تفرق معه بما انه عم يعوض طلبه برا و بلشت افرطله نص حبة دواء بالاكل كبداية لتبلش اعراض خفيفة معه و زيدها تدريجيا كل فترة لتقوى الاعراض و يقتنع انو هو مريض و عم تسوء حالته بعد اسبوعين من اعطائي اله للدواء و زيادته عن جرعته المفروضة زوجي تعب كتيرر و خاصة خلال اسبوعين كان عم يشتكي من تعب و خمول و اعتقد هالشي من تعبه بالشغل و الشغلات الوسخة التانية بعدين بلشت التقرحات تطلع بتمه و وصل بيومين لدرجة قعد بالبيت و ما بقا راح على شغله من الارهاق و انا كان هيك بدي لبلش اعمل يلي رسمته براسي قلتله اقعد ارتاح انت بدك راحة قلي بدي روح عند دكتور اعرف شو عم يصير معي قلتله خلص انا بحكي الدكتور يجي لعندك لانك بجوز توقع و دوخ عالطريق قلي ماشي و فعلا رحت دقيت للدكتور و قلتله زوجي تعبان و ما قادر يجي عالعيادة يا ريت لو انت بتجي وبتعاينه بالبيت وافق الدكتور و طلبت منه انو بس يشخص حالته يطمنه و يقلو انو وضعك منيح وما في شي بخوف وما يقله شو حالته بالضبط لانو زوجي موسوس بالامراض و انه يقلي الي و انا بوصل لزوجي وضعه بطريقة مناسبة وافق الدكتور و اجا و عاينه و قلي مشكلته ما واضحة بس على ما يبدو المشكلة بمعدته لهيك لازم ينزل عللعيادة حتى افحصه اكتر بالاجهزة الطبية قلتله اي طبعا راح الدكتور و فتت عند زوجي و سالني شو حكيتي مع الدكتور قلتلو طلب مني تحاليل دم الك قلي ليش قلتلو ما بعرف ليش وقت سالته قلي لبعد النتائج منحكي و قلي انو بكرا رح ابعتلك شب من المخبر و يسحب منه سيرانك دم و هو بياخده و بحلله قلتلو ما تخاف بظن الدكتور شاكك معك نقص حديد و تاني يوم قلتلو انا نازلة عالسوق جيب اغراض للبيت و نزلت و مريت عالسوق جبت كام غرض و تابعت على مخبر طبي و حكيت وضع زوجي للشب انو تعبان و حالته نفسية سيئة و ما خرج يجي هو ياريت لو تبعتو حدا معي يسحب الدم منه و تفهم الوضع تماما و وافق و وقت سالني الشب شو تحليل الدم يلي طالبتيه نعمله لزوجك قلتلو تحليل ايدز انصدم الشب و قلي هيك تحاليل خطرة و اذا طلع زوجك معه ايدز نحن منخبر الشرطة لتجي تاخده و تحطه بالمركز الطبي يلي بيحجزه و بيعالج هيك حالات قلتلو اوك ما في مشكلة بس يا ريت ما تخبره بانك عم تسحبله الدم كرمال هيك حتى ما يهستر و يجن و يهرب قلي ماشي …

جيت عالبيت و بعد ساعة اجا الشب يلي بده يسحب الدم من زوجي و ساله زوجي للشب ليش سحب الدم قلو كرمال نعرف اذا معك نقص حديد و فقر الدم و النتيجة بعد اسبوع بتبين …

.زوجي بلش يصير معه تعب نفسي طغى على التعب الجسدي و بلشت الوساوس تشتغل شغلها معه اما انا كنت فعلا خايفة كتير انو هاللعبة تقلب حقيقة و بالتالي انا كمان رح كون مريضة ايدز ….

خلال فترة اسبوع كنت زودلو عيار الدوا بس حسه تحسن و خففله بس حسه ساء وضعه كتير و لانو زوجي ما غبي ابدا بلش يشك انو سحب الدم ما كرمال فقر الدم و انو كرمال شي تاني كان خايف بينه و بين حاله يعترف بهالشي و خلال هالاسبوع قبل ما تطلع النتيجة فاجئني وقت قلي ساعديني لقوم اتوضا و صلي و انا استغربت كتير من طلبه و بعد ما صلى قلي اعطيني القران اقرا فيه(زوجي كان بيقدر يقوم و يمشي بس انا اشتغلت على افكار قنعتو فين بانو اذا قمت احتمال دوخ و توقع و انو حرارتك مرتفعة و شغلات كتير ما الها اساس من الصحة بس انا وهمته فين لانو الوهم بيقتل صاحبه)……يتبع

اغفر لي*

الجزء التالت:والاخير

الاسبوع التاني اجا و النتيجة اجت معه و طلعت سلبية و لحمدلله و انا ما رحت عالمخبر لجيب النتيجة دقيت عالتلفون حتى ما يقلي زوجي اعطيني ورقة نتيجة التحليل بس اخدت النتيجة عالتلفون ….و بعدين وقفت عالمراية لزبط حالي قبل ما فوت لعنده و خبره …وقفت و تذكرت كل شي مريت فيه من شهر لهلا كانت الاحداث بذاكرتي متل شريط فيديو عم يمر قدامي بكل التفاصيل الحزينة و هالشي كان ضروري حتى يقسي قلبي اكتر و كمل للاخير بدون اي تانيب ضمير….فتت لعنده و انا عم ابكي و منهارة و قلتلو ايدز قلي شووو قلتلو معك ايدز ….معك ايدز و صرت صرخ من وين جبته عم تخوني …عم تنام مع غيري ….و هو كان ساكت و مصدوم قبل ما يبلش ينهار و يبكي وقت قلتله يعني انا ممكن يكون معي ايدز و واحد من اولادك يمكن يكون معن ايدز انت شو عملت فينا انت دمرتنا و موتتنا وقت اجا بدو يحكي سبقت عليه فورا و قلتلو اوعا تفكر تكذب و تنكر انا هلا تذكرت تفاصيل مرت قدامي و انا متل الغبية ما انتبهت لانو كنت واثقة فيك ثقة عمياء ريحة العطر النسواني على تيابك و العلامات الزرقا على رقبتك هيدا كله ما اجا من فراغ بس الله كبير يمهل و لا يهمل الله عقابه كبير بس نحن شو ذنبنا ندفع غلط نحن ما عملناه انت رح تموت طب نحن ليش لنموت معك حكيت هالحكي كله و زوجي منهار عالاخر و انا كنت عم اطلع فيه و عم احكي بقلبي دوق من يلي دوقتني اياه شوي و طالعت تيابي من الخزانة و بلشت البس قلي شو عم تعملي لوين رايحة و تاركتيني قلتله بدي انزل عالمخبر الطبي حلل الي و حلل لاولادي و اذا بكون معنا هالفيروس رح ارجع اقتلك بايدي …..

نزلت و اخدت الاولاد و رحت حللت الي و الن مع انو بعرف ما فينا شي بس حتى يتاكد انو نحن حللنا بحال اذا سال الاولاد و االولد ما بيعرف يكذب ابدا و بعدها رجعت عالبيت و وقت فتت سمعته عم يتخانق مع شريكه بالوساخة و يقله انت السبب و انت يلي دمرتني و خربتلي حياتي انا ما كان الي بهالقصص انا كنت بحب بيتي و اولادي انا شو عملت بحالي و بعيلتي و وقت فتت سكر الخط فورا وتلبك قلتلو سمعت كل شي قلي شو صار معك قلتلو النتيجة بدها وقت لتبين و رحت و جبت شنتة و فتحتها عالتخت و فتحت خزانتي و بلشت ضب بتيابي قلي شو عم تعملي انت قلتلو عم ضب تيابي و تياب الاولاد قلتلو اذا طلعت نتيجة سلبي رح اخدن و ارجع لبيت اهلي و اذا ايجابية رح نروح عالمركز نتعالج قلي و انااااا قلتلو انت ما بتخصني اعمل يلي بدك اياه وضعك ما بهمني انا الي بحالي و باولادي و احمد ربك اذا ضبطت اعصابي و ما قتلتك قلي طولي بالك خلينا نحكي شوي قلتلو شو بدنا نحكي خلص الحكي بعد هالمصيبة و رجعت عدت الحكي عليه بانك دمرتنا و هدول الاطفال شو ذنبن اذا ما ماتو رح يصيرو يتيمين الاب و بكل الاحوال هادا موت عالحياة لانو انا كتر وحدة بتعرف شو يعني يتم الاب …..

قلي معقول تتركيني بهالظرف و تتخلي عني انا بحاجتك و حاجة الاولاد ما بعرف ايمت رح موت انا بدي اشبع منكن قلتلو قاعدين معك اسبوع بس اشبع من اولادك …..

خلال هالاسبوع زوجي صار يصلي كل فرض بفرضه و يقرا قران حتى احيانا كنت فوت عليه لاقيه قاعد على سجادة الصلاة و ساجد و عم يبكي و يطلب العفو من ربه و يدعي اني ما كون انا او حدا من الاولاد معن هالفيروس ….

الموت …الموت كلمة بحدا ذاتها مخيفة و ما في شعور مخيف اكتر من انو تعرف انو حياتك رح تنتهي بعد شهر او شهرين و رح تترك الدنيا و تطلع عند ربك لتتحاسب على كل غلط عملته و بتشوف هالمدة قصيرة كتير لانك تلحق تستغفر ربك و تتوب توبة صادقة ….هيك كان زوجي يلي اتغير 180درجة حتى صار الهدوء و السكينة واضحة على ملامح وجهه اما جسمه فكان جسم هزيل مع انه الدواء يلي كنت مستمرة عليه المفروض يزيد وزنه بس القلق و الخوف كانو اقوى من اي شي …..

بعد ما طلعت نتيجتي و نتيجة الاولاد بانها سلبية ارتاح زوجي و ضميره كتير و بتذكر قلي هديك الليلة بدي احكي معك قعدت جنبه عالتخت و حكالي كل شي عمله و قلي بدي اطلب طلب اخير منك قلتله تفضل قلي بدي تسامحيني انا غلطت معك و انت ماا بتستاهلي كنت نعم الزوجة و الام بدي موت و انا مرتاح قلتلو ما بوعدك انت حرقتلي قلبي و تابع قلي بكرا بدي اتصل بالمحامي ليجي و يبلش بمعاملة نقل الملكية بكل شي من اسمي لاسمك حتى تقدري تعيشي انت و هالاولاد من بعدي و ما ناقص عليكن شي انا فعلا شفقت عليه و هو عم يدوب قدامي و قلتلو فورا انا حبيتك و بعدني بحبك رغم كل شي عملته و انا ما رح اتركك و رح نرجع عيد التحليل مرة و اتنين لعله يكون مخربطين قلي لا ما مخربطين انا بستاهل هالشي هيدا اقل عقاب من ربي على الشي يلي عملته قلتلو معلش منعيده …..

و مات زوجي الله يرحمه

(لا لا عم امزح ما مات )رجعت جبت شب من مخبر تاني و حلله دم مرة تانية بس هالمرة خبرته النتيجة المزبوطة لانو حسيته فعلا تغير و تاب و طلع من هالتجربة انسان ناضج و مختلف و مسؤول …

بتذكر وقت فتت عنده و هو كان يئسان عالاخير و مسلم لوضعه قلتلو فادي …انت ما معك ايدز قلي شووووو

قلتلو ولله عم احكي جد انت ما معك ايدز دقيت للمخبر و قلي النتيجة سلبية قلي كيف لكن اول مرة طلعت النتيجة ايجابي بهداك المخبر قلتلو مابعرف رح البس و روح اتاكد بنفسي و اخد النتيجة و فرجين اياها للمخبر الاول و خلين يرجعو يطلعولي النتيجة عالكمبيوتر بلكي كانو مخربطين و طبعا فعلا رحت عالمخبرين و جبت النتيجتين يلي بشبهو بعض و رجعت عند زوجي يلي كان قاعد على اعصابه و قلتلو هات البشارة المخبر طلع مخربط بالنتيجة و انت ما فيك شي كانت فرحته ما بيعطيها لحدا سجد لربه و حمده مية مرة ….قلتلو انا برايي لازم تنزل عالمشفى بقا قلي بتعرفيني بستفرغ من ريحة المشافي قلتلو معلش بس احسن حتى يعرفو شو معك بضل هنيك في طاقم واجهزة طبية بفحصوك اكتر لتعرف من شو هيك عم يصير معك و طلبتله سيارة اسعاف من المشفى و رحنا قعدنا اسبوع و بهالاسبوع رجع متل اول (طبعا انا وقفتله الدواء يلي كنت اعطيه اياه لهيك رجع اتحسن)و بعد ما طلعنا من المشفى باع زوجي الشقة يلي كان شاريها لقصصه و قطع علاقته مع رفيقه تماما يلي عرفت بعدين انو كمان تاب و بطل هيك حركات لانو خاف بعد ما سمع بمرض زوجي …..

انتهت .رجاء نسخ الهاشتاغ و اسم الكاتبة Hla_gharabli عند نشر القصة بكروبات اخرى

#Hla_gharabli