كيفية عمل عجينة البيتزا المميزه
كيفية عمل عجينة البيتزا المميزه
المقادير
- 4 كوب طحين ونص تقريبا .. حسب نوع الطحين
- بيضه
- 4 معالق زيت زيتون
- معلقه كبيره خميره
- معلقه كبيره سكر
- ملعقه صغيره ملح
- كوبين حليب دافي
- لعمل البيتزا بنحتاج :
- خضروات مقطعه شرائح حسب الرغبه
- استخدمت شرائح بندوره وفلفل حلو
- جبنة تشيدر
- جبنة موزريلا
- شرائح الزيتون اختياري
- شرائح الفطر اختياري
- لصلصة البيتزا السريعه بنحتاج :
- نص كوب كاتشب
- ثلث كوب صلصة بندوره
- ملعقتين ماء
- ملعقتين زيت زيتون
- نصف ملعقه زعتر مجفف
- نصف ملعقه ثوم بودره
- نصف ملعقة بابريكا
- نصف ملعقه صغيره فلفل أسود
الخطوات
السلام عليكم ..ويسعد أوقاتكم
اليوم وصفتنا بيتزااا ..وصفه رائعه وطيبه كثير
يلا نشوف الطريقه …
& اول شي بنخلط المواد جميعا سوا باستثناء كوبين طحين …بنبلش عجن فيها باضافة الحليب
وبنبلش نضيف بالكوبين الطحين يلي ضلو ونعجن لحتى تلم معنا مزبوط تقريبا بدها عجن لمدة عشر دقائق
طبعا بنضيف كمية الحليب والطحين كامله
بندهنها بزيت ونغطيها وبنتركها تختمر لمدة ساعه
بعد الساعه بتكون جاهزه معنا لنشتغل فيها
& بنرق العجينه حسب الحجم يلي بدنا اياه
وبنضعها بصينية الخبز وبنضعلها صلصة البيتزا والجبنه والخضروات اختياريه انا استخدمت بندوره وفلفل حلو وجبنة موزريلا وشيدر
& عملت صينية بشراءح البندوره والفلفل الحلو
وصينية جبنه لحالها لنرضي الأطفال لانهم ما بحبو الخضار كثير عليها ..
& بدخلهم الفرن المحمى عالدرجة حراره وسط لحتى تستوي العجينه وبلاحظ انه اطرافها تحمرو شوي بطلعها وبحمرها ما بتاخذ وقت كثير بالفرن
وهيك البيتزا صارت جاهزه معنا وكثير طيبه
& طريقة صلصة البيتزا البسيطه والسريعه:
بنضيف المواد كلها يلي ذكرتها بالمقادير وبنخلطها مزبوط وبندهن فيها العجينه ..سهله وطيبه ..
بتمنى هالوصفه تنال اعجابكم
دمتم بخير
