بودرة مرقة الخضار الفورية
بودرة مرقة الخضار الفورية
المقادير
- 2 جزر كبير
- 2 كوسا كبير
- بصلة كبيرة
- راس ثوم كامل
- 1 يندورة وسط
- 1 بطاطا وسط
- 1 فلفل أخضر
- حزمة كرفس
- نصف حزمة بقدونس
- نصف حزمة كزبرة
- 5 ورق غار
- 5 حبات هيل
- م.ك نشا
- نصف كوب ملح
- م.ك سكر
الخطوات
السلام عليكم ورحمة الله وبركاته
استكمالا لوصفات بودرة المرقة الفورية ، عملتها عدجاج من قبل واليوم حبيت اعملها على خضار نكهه غير ومفيدة للنباتيين ، وبتتميز انها مافيها توابل الا الهيل بس هيه مجموعة من الخضار .
أولاً/ فرم الخضار
بنفرم كل الانواع الموجودة بالمقادير سوا فرمة ناعمة ، اذا الكبّة عندك صغيرة افرميهم على دفعتين لانه كميتهم منيحة كبيرة شوي.
ثانياً/ التخلص من الماء الزائد
بعد الفرم الناعم بنضيف نصف كوب ملح وملعقة سكر للخلطة وبنقلبها كويس وبنتركها بمصفى ربع ساعة رح تنزل منها مي كثيرة .
ثالثاً/ التجفيف بالفرن
بنعصّر الخضرة بايدنا مزبوط وبنفردها بصينية فرن طبقة رقيقة وبندخلها الفرن المدفى على 150 حرارة هاااادية جدا يعني دافي مش سخن الفرن .
—لمدة ساعة وبنطلعها بنقلبها وبنرجعها كمان ساعة تتجفف تمااماً.
رابعاً/ الطحن
بعد تجفيف الفرن بنتركها تبرد قبل الطحن وبنطحنها ناعم جدا وبالآخر بنضيف ملعقة نشا وبنقلبها وبنحتفظ فيها بمرتبان محكم برا الثلاجة عادي ما بتخرب.
خامساً/ الإستخدام
تستخدم تابل مثل باقي التوابل وخاصة للطبخات الفقيرة بالخضار بتعطي نكهه جديدة ولذيذة جدا.
والف صحة وهنا
