مضغوط بالدجاج

المقادير

• دجاجه مغسوله منيح ومتبله قبل باربع ساعات
• التتبيلة:
• الملح
• الليمون
• الفلفل
• البهارات المشكله
• اي بهارات بتحبيها
• باقي المكونات:
• ثلاث كاسات ارز طويل الحبه
• خضار مشكله ومقطعه دوائر مثل الحزر والبطاطا والفليفله والفلفل الحار
• ملح
• رشة فلفل اسود
• ملعقه بهارات مشكله
• رشة زنحبيل مطحون
• رشة هيل مطحون
• راسين بصل حجم وسط مقطعين دوائر
• حبتين او اكثر بندوره
• زيت للطبخ
• لعمل الارز:
• عودين قرفه
• حبات من الهيل
• ورقتين غار
• معلقة ملح

الخطوات

بسم الله الرحمان الرحيم

يسعد اوقاتكم صبايا اليوم طق ببالي اعمل مضغوط من كتر ما اسمعت عنه قلت لحالي لازم اعمله قبل ما انضغط عملته والحمد لله وتمت العمليه بنحاح المهم عجب افراد الاسره وطلبوا مني اعيدها وانا بصراحه لقيتها طيبه وسهله شكلي رح اضل اعملها لما انسيهم المقلوبه والمنسف هذا اذا بقدر

يا ستات يا معدلات طريقتي كالاتي وبنصح الي ما جربتها تجربها لانها طيبه وسهله

طبعا بنحضر كل شي مسبقا حتى ما نتكركب بنتبل الدجاج قبل بفتره ليله او اربع ساعات حتى لو انسيتي ما تبلتيهم عادي بس الافضل يتبلوا مسبقا وطبعا بنقطع الخضار مسبقا وبنجهزها

الخطوه الاولى بحضر طنجرة الضغط وبضع فيها الزيت والبصل المقطع دوائر وبضيف الحزر والفليفله والفلفل الحار والبطاطا وشرحات البندوره وبتبلهم وبملحهم وبضيفلهم الدجاج المتبل وكاسة مي سخنه ولما يغلو بسكر الطنجره وبحسبلها بعد ما تصفر بربع ساعه وطفي في هذه الاثناء بكون حطيت كمية مي على النار مع ورق الغار وعودين قرفه

وحبات من الهيل ومعلقة ملح وشوية زيت وبضيفلهم الارز المنقوع لمدة خمس دقائق ومغسول وبتركه قبل ما ينضج بشوي بطفي الغاز وبصفي عنه المي بالمصفايه وبفتح الطنجره رح الاقي مع الخضار كميه من المي باخذ منها جزء في صحن وبتركه على جنب وبضيف الارز فوق الدجاج والخضار وبضيف عليهم صحن الشوربه الي وضعته على جنب وبدوب شوية عصفر بشوية مي وبصبها على الارز على شكل خطوط حتى احصل على ارز لونين ابيض واصفر وبغلق الطنجره ربع ساعه على نار هاديه وهيك بتكون انتهت اكلة المضغوط بتقدميها بالطريقه الي بتحبيها مع اللبن والسلطه وبتزينيه باللوز اذا بتحبي انا ما زينتها لاقيت كل الوان الربيع فيها مزينه حالها لحالها والاحمر والاخضر والاصفر والابيض بس فعلا كانت طيبه واذا جربتوها صحه وهنا مسبقا

سامحوني على الاطاله ربنا

يكرمكم جميعا ويحميكم اينما حللتم

استودعتكم لله