فاصوليا بعبها محشي ملكة الاكلات السورية
فاصوليا بعبها محشي ملكة الاكلات السورية
المقادير
- كيلو فاصوليا خضرا
- نص كيلو كوسا
- كيلو بندورة خضرا
- كاستين رز قصير
- معلقتين كبار دبس بندورة
- معلقتين كبار دبس فليفلة
- راس توم
- تلات معالق كبار كزبرة
- ملح وفلفل
- لحمة ناعمة
الخطوات
♡يسعدلي كل اوقاتكن ان شاءلله الكل بخير
حبيت اقدملكن هالاكلة الخفيفة وخاصة بهالشوبات هي فاصوليا ومدفون بقلبا محشي هي اكلة سورية بس كتير طيبة جربوا ورح تدعولي
♡يلا نشوف الطريقة♡
♡بسم الله الرحمن الرحيم♡
اول شي عملتو قمعت الفاصوليا وفرمتا وسط
فرمت البندورة مكعبات وسط
حفرت الكوسا وغسلتو
وبلشت بتجهيز الحشوة والي هي
نقعت الرز نص ساعة وغسلتو منيح من النشا ضفت عليه الدبس بندورة والفليفلة وملح والفلفل الاسود واللحمة وخلطتن منيح وحشيت الكوسا تلات ارباع الكوساية لحتى يكون مفلفل
دقيت التوم وجهزتو
♡هلق منبلش بتطبيق الطبخة ♡
حطيت بطنجرة معلقتين كبار سمنة وشوية زيت نباتي وقليت اللحمة والتوم والكزبرة الناعمة منيح نزلت عليهن الفاصوليا وتركتن عشر دقايق بعدين ضفتلا البندورة وعدلتلا الملح شلت نص الفاصوليا بعد ماحطيتلا البندورة وطبقت الكوسا على شكل طبقة ورجعت حطيت الفاصوليا فوقا غطيتا وتركتا تقريبا ساعة ونص ع غاز واطي او حتى يستوي الفاصوليا والكوسا وقدمتا بهالشكل
♡وهي كانت طبختي ان شالله تكون عجبتكن وتجربوا وتعطوني رئيكن ♡
♡وان شالله الف صحةوهنا ♡
