كنافة ناعمة من الألف إلى الياء
كنافة ناعمة من الألف إلى الياء
المقادير
- مقادير عجينة الكنافة:
- كوب طحين
- نصف كوب نشا
- 2 كوب سميد ناعم
- م.ص بيكينج باودر
- م.ص خميرة
- م.ص سكر
- ربع م.ص كربونة
- لعمل الكنافة:
- جبنة عكاوي محلاه من الملح
- سمنة مذابة
- صبغة اختياري
- قطر بارد
- للتزيين:
- فستق حلبي
الخطوات
كنافة ناعمة من الألف إلى الياء
السلام عليكم ورحمة الله وبركاته
الكنافة الناعمة عشق لكثييييير من الناس وانا شخصيا مابحب الكنافة الناعمة الا اللي بعملها بالبيت كثير طيبة وبتتحكمي بسمنتها وقطرها وكلشي وسهلة جدا حبيت اشارككم فيها من بداية العجينة للتقديم النهائي ان شاء الله بتعجبكم وبتجربوها.
أولاً/ فرك الكنافة (العجينة)
اتبعت طريقة الصب لقيتها اسهل واسرع لانه في طريقة رق عجين .
بنخلط المواد الجافة الطحين والسميد وباقي المواد وبنضيف كاسة الحليب وبنخلط وبنرجع بنضيف حليب لحتى يصير المزيج مثل خليط الكيك.
—بنصب العجينة بصينية فرن مدهونة او عورق زبدة وبنفردها بسماكة رقيقة .
—وبندخلها على فرن محمي وسط عالرف الوسط مابدنا يتغير لونها نهائيا بس تنشيف بنشفها 7 دقائق وبنطفي الفرن وبنختبرها بعود خشب وبنتركها بالفرن الساخن ومغلق ومطفي لمدة 5 دقائق كمان وبنطلعها تبرد.
ثانياً/ آلية انتاج الفرك
بنترك العجينة تبرد وبنفتتها باليد وعالمحضرة بنطحنها واذا حسيتيها فيها رطوبة اتركيها مكشوفة ساعة ساعتين وارجعي اطحنيها كمان مرة للتنعيم.
—وهيك الفرك جاهز للاستخدام اما بتستخدميه فورا او بتفرزيه.
ثالثاً/ الكنافة
لكل كاسة فرك بنحتاج ملعقتين كبار سمنة مذابة بنفركها فيها وبنرش رشة صبغة برتقالية اختياري.
—بندهن صينية بسمنة دهنة خفيفة و بنرص فيها الفرك وبنضغطه مزبوط وفوقه جبنة العكاوي الحلوة غير مالحة وبنضغطها برضه بشكل ممتاز .
ملاااحظة مهمة/
الناس يلي بتشكي انه الجبنة العكاوي ما بتمط معهم ولا بتعطي هالمنظر الرائع بكون السبب انها مالحة مش حلوة كفاية لازم تكون محلاه بشكل ممتااااز.
رابعاً/ الشوي
بننقل الصينية على عين الغاز الصغيرة وعلى نار هادية جدا وبنخليها حوالي 7 دقائق مع تدوير الصينية بين فترة وفترة رح تعرفي انها استوت بس تهزي الصينية وتتحرك شقفة وحدة معك واخر دقيقتين غطي الصينية عشان تذوب الجبنة.
—بنقلبها في صحن مناسب وبنسقيها قطر بارد قوامه وسط وبنزينها بالفستق الحلبي.
—والف صحة و هنا
ملاحظة/
اخر صورة تنفيذ للكنافة الناعمة الخالية من الجلوتين ضمن دورة تابعة لجمعية أصدقاء مرضى حساسية القمح.
