طريقة مقلوبة الدجاج ملكة الأكلات الفلسطينية
طريقة مقلوبة الدجاج ملكة الأكلات الفلسطينية
المقادير
- دجاجة منظفة او حسب الحاجة
- نص كيلو ارز تايجر او حسب الحاجة
- حبتين باذنجان
- حبة بطاطا
- حبة بصل
- ثلاث اسنان ثوم مقطعات
- لسلق الدجاج:
- ماء
- لتشويح الدجاج:
- سمنة
- بهارات المقلوبة:
- ملعقة صغيرة كمون
- ملعقة فلفل اسود
- باكيت ماجي
- اعواد قرفة
- ملعقتين هيل
- ملعقة من بهارات المقلوبة المشكلة
- ملعقة صغيرة كاري اختياري
- رشة كركم صغيرة
- ملح
الخطوات
السلام عليكم ورحمة الله ..
المقلوبة من الأكلات الشهية جداً والمعروفة في بلاد الشام طبعاً بتختلف من بلد لبلد ،، وتقريباً بالاردن وفلسطين بطبخوها بنفس الطريقة وطبعاً مافي ست بيت مابتعرف تطبخ المقلوبة لكن ممكن كل ست الها لمسة خاصة او طريقة خاصة لطبخها وبدي اقدملكم طريقتي وبتمنى تعجبكم ويمكن يكون كثير منكم بعملها بنفس طريقتي .
بسم الله نبدأ…..
أولاً :
بنضع الطنجرة على النار وبنضيف السمنة كمية منيحة وشوي زيت ذرة بالنسبة للسمنة انا بحب اطبخ فيها الارز بكل اشكاله بتعطي نكهة طيبة للرز ودسامة واللي مابحبها بقدر يستبدلها بزيت ذرة لحاله .
بس تحمى السمنة مزبوط بنشوح قطع الدجاج بالتدريج لحتى نحصل على اللون الاشقر ويتحمر عالوجهين يعني القطعة اللي بتتحمر بنشيلها ع جنب
ثانيا:
بس نكمل تحمير قطع الدجاج بنفرغ السمنة اللي بالطنجرة بصحن وبتركها ع جنب وبنترك شوي منها بقاع الطنجرة ونضيف قطع البصل والثوم وبنقليهم شوي وبعدها بنضيف قطع الدجاج وجميع 0البهارات ماعدا الملح وبقلب شوي وبعدها بنضيف كمية وافرة من الماء المغلي وبس تتكون الرغوة ع وجه الطنجرة بنشيلها بملعقة وبنزبط الملح وبنترك الدجاج يسلق ويستوي على مهله.
ثالثاً:
بنقطع الباذنجان والبطاطا شكل شرائح
واذا متوفر زهرة كمان انا ماحطيت زهرة اليوم لأن بالصيف الزهرة اغلبها مابتكون نظيفة فاستغنيت عنها ،، بنقلي الخضار المتوفر وبنحطه بمصفايه لحتى ينزل الزيت الزايد منه
رابعاً:
تطبيق المقلوبة ….
بقاع الطنجرة بنضع الخضار المقلية عالاغلب هيك بعمل انا أو بتحطي قطع الدجاج وفوقها الخضار المقلية ،، وبعدها بنحط الرز المنقوع والمغسول والمصفى ،،، بالنسبة إلي الرز مابضيفله اي نوع بهارات او توابل بكتفي بالتوابل الموجودة بماء سلق الدجاج .
بصفي ماء سلق الدجاج وبضيف الكمية المناسبه منها للرز مع اضافة السمنة اللي شوحنا فيها الجاج اللي شلناها ع جنب حسب الحاجة وبشغل النار عالية تكون لحتى يغلي وبتركها للتشرب شوي وبس يصير مستوى السوائل قريب من سطح الرز بنوس للغاز وبتركها تتهدا وتتشرب ويتفتحو حبات الرز لمدة ربع ساعه لثلث ساعه وبعدما يستوي الرز بنطفي النار وبنتركها من عشر دقايق لربع ساعه وبعدها بنقدمها وبننقض عليها ههههه
المقلوبة زكاوتها وهي سخنة وتكون لسا رطبة شوي هيك انا بحبها بتتقدم مع اللبن الرايب والسلطة وصحة وهنا على قلوبكم
