بوظة الشمام رووعة
بوظة الشمام رووعة
وهلأ تعالو معي عالمطبخ نعمل أحلى طنجرة بوظة ونقضي عليها
المقادير
- نصف شمامة اللي هية البطيخ الأصفر أو بالتركي قاوون هههههه
- 3 ظرف كريمة بودرة مخفوقين
- مع كوب كبير حليب بارد
- علبة قشطة
- عسل أو سكر مطحون حسب الرغبة
- ملعقة وزبدية للأكل
- وأكيد بتحتاجوني مشان ساعدكم بالأكل هههه:
الخطوات
☆بسم الله الرحمن الرحيم☆
الطريقة بسيطة كتييير يا حبوبات وماشاء الله الأخوات أبدعو وكفو ووفو بتنزيل طرق البوظة بأنواعها الله يباركلهم بس رح كتر غلبة وعيد الحكي شوي هههه
أول شي بعد مانقطع الشمام منحط القطع بصحن جنب بعضها ومندخلها الفريزر لتتجمد منيح وبس تتجمد منطالعها ومنضيف معها السكر أو العسل ومنطحنها منييييييييييح لحتى مايضل عنا بلورات تلج ها وتندمج منيح مع الكريمة
منخفق الكريمة مع الحليب ومنضيف عليهم القشطة ومنرجع نخفقهم شوي لنحصل على كريمة متماسكة
وبعدا منخلط بهدوء خليط الكريمة مع خليط الشمام وبالنسبة الي من هون بلشت مرحلة الأكل هههههه
منصبهم بعلبة حافظة او الها غطا ومندخلهم الفريزر وكل حوالي ساعتين منطالعهم منخلطهم مشان الأطراف تندمج مع الخليط اللي جوا وما يصير فيها بلورات تلج ويجمدو بطريقة متساوية
يعني الأفضل تعملوها من الصبح مشان تقدرو تخلطوها مو تعملوها بالليل وتنامو وتخلطوها بمنامكن ههههه
وبس تجمد منيح استمتعو بنكهة ولا ألذ
أصلا ماعرفتو للشمام وهو بوظة ههههههه
وملاحظة أخيرة
انا ماعندي المغرفة الخاصة بالبوظة فبللت الملعقة ومشيت فيها بالتدريج عالبوظة لتعطيني الشكل الملفوف..
يارب تكونو حبيتوها وتجربوها انتو وكتاكيتكم الملائكة ههههه
وماتنسو تدعولي بالبركة وبكل شي حلو متلكم
بحبكم أنا وأستودعكم الله ♡
