طريقة عمل اشكال المعجنات
طريقة عمل اشكال المعجنات
المقادير
- مقدار العجينة
- ٩ كاسات طحين
- خمس معالق كبار خميرة فورية
- خمس معالق كبار سكر
- رشة ملح
- مي دافية حسب ماتتكون العجينة
- بصلتين
- للمحمرة
- تلات معالق دبس فليفلة
- معلقة صغيرة كل من ملح ونعناع وكزبرة ناعمة وحبة بركة وسمسم ونص معلقة صغيرة ملح ليمون
- للزعتر
- زيت زيتون وزعتر
- للجبنة
- نعناع ناشف وحبة بركة وفليفلة حمرا ناعمة
الخطوات
مين مابحب المعجنات رح اقدملكن طريقة تشكيل جديدة رح تبهر وتعجب عيلتكن يلا نشوف
*بسم الله الرحمن الرحيم *
العجينة خلطت الطحين والسكر والخميرة والملح ونزلت عليهن بالمي الدافية اخدت مني اربع كاسات مي دعكتا منيح وتركتا ساعة تختمر بمكان دافي
طريقة المحمرة
قليت البصل ليشقر لونو ضفتلو الدبس فليفلة ونزلت التوابل عليهن رح تستغربو من الملح ليمون بس عنجد بيعطي نكهة كتير طيبة فيكن تستغنو عنو وتحطو بدالو دبس رمان تركتن كم دقيقة عالغاز وتركتا تبرد
للزعتر
خلطتالزعتر والزيت وتركتن عالزيق
للجبنة
بشرت الجبنة وحطيت عليها النعناع والفليفلة وحبة البركة وخلطتن وتركتن عالزيق
طريقة التشكيل الوردة الجوري الي بالجبنة
عملت دوائر من العجينة وحشيتا جبنا وشكلتا متل الهلال وبالشوكة ضغطت عالزيق جبت دائرة وعملتلا اربع شقوق من الاطراف وحشيتا جبنة وصرت الف كل طرف عالتاني حطيتا بوسط صينية الفرن بعد مادهنتا بالزيت صرت جيب من الي عملتن شكل هلال وابدا اصف وحدة جنب التانية ليبلش يطلع معنا شكل الوردة لخلصت كل الكمية حسب اديش بتحبو حجما بتضيفو قراص بتركا ترتاح لوقت اعمل البقية
لعمل الوردة التانية حشيتا زعتر
عملت تلات قراص من العجينة مو سميكة رقيقة قد بعض دهنتن بتبلت الزعتر وجبت اول قرص حطيتو فوق التاني والحشوة لفوق والتاني نفس الشي بس التالت خليت الحشوة لتحت جبت كاسة وحطيتا بالنص وبالسكينة اقص الاطراف ل١٦ طرف بعد ماقصيتا صرت اجيب كل طرفين وادورن عكس بعض لدورتين والزق كل تنتين سوا بشيل الكاسة وبحطا بصينية مدهونة زيت بتركا ترتاح لاخلص الكمية
لعمل المحمرة عملتا قراص بسمك واحد سانتي وحطيتن بصينية فرن ووزعت عليهن الحشوة اذا بدكن بتضيفولا جبنة بس انا اكتفيت هيك
زاد عندي شوية عجينة عملتا شكل كروسان
عملت قرص كبير وقصيتو ل٨ اقسام حشيتو شوكلا ولفيتو وعالصينية
بعد ماخلصت كل الكمية
حميت الفرن مزبوط وصرت ادخلن عالفرن
طالعتن من الفرن وقدمتن بالشكل هاد
ان شالله تكون عجبتكن طريقة التشكيل
عطوني رئيكن ولاتنسو تجربون
♡والف صحةوهنا عقلبكن ♡
