قصة… انا و جارتي مع حسن الطن

جارتي كانت مستلفه مني الف جنيه ولما جت تردهم حطتلي الالف جنيه بتاعتي ف الاسانسير وبعتتلي رساله اخدهم وانا مشوفتش الرساله والالف جنيه ضاعت ..

ساعتها تسعه وتسعين في الميه من الناس قالولي اتخانقي معاها وقوللها مليش دعوه انا عايزه فلوسي انتي الغلطانه وخدي فلوسك منها ومتسكتليهاش واكيد هي وخداهم وضاربه عليهم ساعتها انا مسمعتش الكلام بالعكس اتكلمت معاها عادي خالص رغم حوجتي ساعتها للفلوس قعدت اهزر معاها واقولها عقابا ليكي هتعزميني علي ماك وكمان هخرج مع جوزي واسيبلك ابني وقعدت اقولها فداكي ف داهيه الفلوس دي فديت بيها عيالي والكلام ده بعدها بخمس ايام لقيت واحده ف العماره بتديني الفلوس بتقولي انها لقتهم وشالتهم لحد ماحد يسال عليهم ساعتها حمدت ربنا اني مخسرتش جارتي ولا كلمتها وحش وعلاقتنا بقت اقوي..

الفتره دي كنت مسافره وعربيه الاطفال بتاعتي تقيله اوي فقالتي خدي بتاعتي اخف من بتاعتك قولتلها ماشي واحنا راجعين عربيه الاطفال ضاعت مننا ف المطار وبقيت بلطم عشان دي غاليه جدا ومش بتاعتي ومش عارفه هقولها ايه عملنا محضر وروحنا البيت وقعدت تلات ايام مجبتلهاش سيره خالص ومش عارفه اجبهالها ازاي لحد ماجمعت شجاعتي وقولتلها بصي انا عايزه اقولك علي حاجه بس هي حاجه وحشه لقيتها برقت قولتلها بصراحه الاسترولر بتاعتك ضاعت مننا ف المطار وهما قالو هيرجعوها ف خلال اربعه وعشرين ساعه ودلوقتي بقالنا تلات ايام يعني مش هترجع ف انا هروح اجيبلك واحده زيها بالظبط بقولها كده وانا مرعوبه من رد فعلها لقيتها قالالي اللللللللله يخربيتك خضيتيني فكرت جوزي بيخوني ولا حاجه ما في داهيه الاسترولر المهم عيالك كويسين الحمد لله انها جت فيها مجتش في حاجه تانيه لقيت نفسي مكسوفه اكتر من رد فعلها وقولتلها والله هجيبلك زيها قعدت تهزر تقولي انتي لاقيه تاكلي لما تحيبيلي واحده زيها يا شحاته يالا فداكي وفدا عيالك (((( عقابا ليكي هتعزميني علي ماك )))))) ولقيت معاملتها معايا عاديه جدا ولا اكني عملت حاجه رغم ان الاسترولر بتاعتها معديه ال 5000 معاملتها زي ماهي ونزلت قالت لجوزها قالها فداها مش مشكله ومستحيل هنقبل العوضولقتها طالعه تاخد رايي في طقم تلبسو ولا جابت سيره تاني للاسترولر ولا يا خساره ولا اي حاجه بس جوزي اصر نجيبلها واحده تانيه زيها بعد يومين لقينا المطار بيكلمونا بيقولو الاسترولر جت وهيبعتوها ع البيت كلمتها قولتلها الاسترولر جت فرحت اووووووووووي يعني اد ايه كانت من جواها زعلانه ومش مبينه ؟؟ هل لو كانت اتعاملت معايا وحش وقعت تزعق ولا قالت مليش دعوه عايزه غيرها والاسترولر رجعت هل هيبقي معزتها في قلبي زي دلوقتي ؟؟؟

اللي عايزه اقولو من الرغي ده كله ان معادن الناس بتبان وقت الزنقه ، وقت المشاكل ، وقت حقي وحقك وقت انت صاحبى بعيوبك أو مستنيلك على غلطة…

، وقت تعارض المصالح، وقت الزعل والخصام ، وقت الحزن ووقت المرض شوف مين سأل عليك ووقف جنبك مين دافع عنك و وقف للظلم و رفعوا عنك..

متحكموش ع الناس انهم جدعان بمجرد شويه مدح وضحك وهزار وخروج اعرفوهم وقت الزنقه.

جرب بس اتحط مع حد في موقف صعب وشوف مين الحقيقي من الفالصو.

الناس كلها حلوة وقت الضحك والهزار والخروج لكن وقت الزنقه كله بيطلع الي جواه وبيظهر ويبان علي حقيقته.

عد مين وقف جنبك وقت شدتك ومتزودش عليهم حد.

منقول