مندي و صلصة دقوس ملكة الأكلات اليمنية
مندي و صلصة دقوس ملكة الأكلات اليمنية
المقادير
- دجاجة مقطعة ومنظفة
- نص كيلو رز بسمتي
- راس بصل كبير مقطع شرائح
- بهارات الرز:
- ملعقة قرنفل
- ثلاث حباب لومي
- ملعقة كزبرة ناشفة
- ملعقة هيل
- ورق غار
- عيدان من القرفة
- ملح
- بهارات الدجاج:
- 3 ملاعق لبن زبادي
- ملعقة كبيرة صلصة بندورة
- فنجان خل
- نص كوب زيت زيتون او زيت ذرة
- عصير ليمونه
- ملعقة كبيرة من بابريكا
- بهار الكاري
- بهار الدجاج
- ملعقة وسط قرفة ناعمة
- بودرة بصل
- بودرة ثوم
- سن ثوم مقطع
- قليل من ملون الغذاء لون الاحمر
- ماء كادي للرز (اختياري)
- ملون غذاء اصفر
- ملون غذاء برتقالي
- مقادير صلصة الدقوس:
- حبتين بندورة
- نصف حبة فلفل اخضر حلو
- حبة او اقل من الفلفل الاخصر الحار
- راس بصل صغير
- 3 أسنان ثوم
- ملعقتين خل
- نص ملعقة سكر
- ملح
- ملعقة كبير صلصة بندورة
- ملعقة كبيرة زيت زيتون
الخطوات
السلام عليكم ورحمة الله وبركاته .
بسم الله نبدأ …..
أولاً:
بنعمل تتبيلة الدجاج المكونة من اللبن الزبادي وصلصة البندورة وسن ثوم وملح وبهار كاري وبهارات دجاج وبابريكا وقرفة ناعمة وبصل بودرة وثوم بودرة واقل من ربع ملعقة ملون غذاء احمر وفنجان خل وعصير ليمونه ونصف كوب زيت زيتون او زيت ذرة ونخلطهم جيداً عالخلاط وبنتبل الدجاج فيهم وبنغلفه وبنتركه بالثلاجة مش اقل من ساعتين .
ثانياً:
نضع الدجاج بصينية الشوي مع كاسة ماء وعالفرن الرف السفلي بعد ما نغلفه بالقصدير مدة ساعة وبعدها بنكشف القصدير وبفرشاية ناخذ من مرق الجاج اللي بقاع الصينية وبندهن وجه الدجاج وبنحمره وبنولع فحمة وبندخنه.
ثالثاً:
بننقع الرز بماء ساخن بعد مانغسله.
بطنجرة عالنار بنضع فيها ملعقة سمنة كبير مخلوطة بشوي زيت ذرة وبنذبل البصل المقطع شرائح وبس يتحمر بنشيله ع جنب وبنفس الطنجرة بنضع مقدار كوب رز وبنحمصة لحتى يصير لون الرز بني او اشقر رح تلاحظي انه بالبداية بتكتل بس بعدين رح يفك وهالحركة هاي اختيارية بتقدري تستغني عنها.
بس يتحمر الرز معنا بنضع جميع انواع بهارات الرز وقليل من البصل المحمر وباقي الرز وبنحرك وبنضع فوقهم مقدار ماء مناسب للرز وبنغطي عليه لحتى يغلي ويبلش الماء يصير لعند مستوى الرز بنوطي للنار وبنحركه وبنغطيه وبتركه.
وقبل مانطفي النار بعشر دقائق بنضع ملون الطعام اللون الاصفر والبرتقالي او منقوع الزعفران وملعقة صغيرة من ماء الكادي (اختياري) وبس يستوي بنكون مولعين فحمة وبنعمله تدخين بالفحم وبنغطيه بقصدير وبنتركه اقل شي نص ساعة.
رابعاً :
التقديم…
بنضع الارز بصينية تقديم مناسبة وفوقها الدجاج وبنزين بشرائح البصل والمكسرات .
صلصة الدقوس:
بنطحن حبتين البندورة عالخلاط مع القليل من الماء
بنقطع البصل والثوم ناعم ونحمسه بالقليل من الزيت وبس يتذبل بنضيف قطع الفلفل الاخضر الحار والحلو وبنحرك شوي وبعدها بنضيف ملعقتين خل ابيض وبس يبلش يغلي بنضيف ملعقة كبيرة صلصة بندورة وعصير البندورة اللي بالخلاط وملح ونص ملعقة سكر وربع من بودرة البصل والثوم وبنتركهم يتسبكو حتى يثقل الخليط،
بعدها برجعه عالخلاط مع ملعقة زيت زيتون وسن ثوم صغير او حسب الرغبة وبرجع بخلطها حتى نحصل على خليط ناعم.
واستمتعي بأطيب انواع صلصة الدقوس وانتي بتقدري تتحكمي بكمية الفلفل الحار حسب ماتحبي
وصحة والف عافية
