البهارات المشكلة المنزلية

المقادير

• ربع كوب كمون حب
• ربع كوب شومر حب
• ربع كوب كزبرة حب
• م.ك فلفل اسود حب او مطحون
• م.ك قرنفل حب
• م.ك بصل بودرة
• م.ك هيل حب
• م.ك قرفة بودرة
• م.ك كركم بودرة
• 4 ورق غار
• م.ك زنجبيل مطحون
• م.ص ملح

الخطوات

السلام عليكم ورحمة الله وبركاته

مافي طبخة بتخلى من البهارات ولكل طبخة بهار معين شي للكبسة شي للمقلوبة شي للدجاج شي للحمة ، بس في بهارات مشكلة بتصلح لكل انواع الطبخات ، ويلي حبيت اقدمها اليوم لإنه البهارات المنزلية بتكون غير شكل نكهه اقوى وبتزيدي وبتنقصي زي مابدك بالمكونات.

أولاً/ الخلطة

في مكونات صحيحة وفي مكونات مطحونة رح نشتغل اول شي بالصحيحة.

بنخلطهم سوا وبنحمصهم بقلاية على نار هادية ونقلبها كل شوي لحتى يتغير لونها ويطلع منها دخنة خفيفة بنطفي الغاز وبنضيف البهارات البودرة وبنتركهم يبردوا تمااااماً.

ملاحظة/

التحميص اله فوائد انه تطلع النكهه قوية وانه يتغير لون البهارات بصير احلى واخر شي بنطلع الرطوبة منها.

* الفلفل يفضل يكون حب ويتحمص معهم بس كان عندي مطحون استخدمته زي ماهوه.

ثانياً/ الطحن

بنطحن البهارات بعد مابردت على مطحنة البهارات ناعم وبس نكمل طحن بنضيف ملعقة صغيرة ملح ناعم ، لحفظ البهارات .

ثالثاً/ الطعم والحفظ

طعمها زاكي وحارة شوي صغيرة ( بسبب القرنفل والفلفل) وممكن تستخدم لكل الطبخات عدا المنسف اله بهارات خاصة مختلفة كلياً رح اعملها وانزلها قريبا.

* تحفظ في مرتبان زجاجي بالمطبخ بعيد عن الرطوبة. او اذا عملتي كمية كبيرة حطيها بالفريزر بتنحفظ نكهتها لمدة اطول.

رابعاً/ خيارات

بعد تجهيز البهارات ممكن اذا بتحبيها صفراء تزيدي شوية كركم ، وإذا بتحبيها حارة بتضيفي شوية فلفل ، وهكذا الخيارات واسعة ومتعددة هاي بهاراتك الخاصة تحكمي فيها زي مابدك.

*بتمنى تجربوها وتعطوني رأيكم وصحة وهنا.