محشي بلبن محشي فريكة ورز كتير طيب ملكة الأكلات السورية

المقادير

• كيلو كوسا
• لحمة ناعمة
• للحشوة:
• نص كاسة فريكة
• نص كاسة رز
• ملح
• فلفل اسود
• معلقة كبيرة سمنة
• للحمض:
• مي
• معلقة كبيرة ملح
• مكعب ماجي
• للصلصة:
• لبن او زبادي
• توم
• نعناع ناشف
• ملح

الخطوات

يسعدلي كل اوقاتكن اليوم وصفتي من مطبخنا الحلبي محشي الكوسا بالرز والفريكة يمكن تستغربو منا بس اكلة كتير طيبة وخفيفة وخاصة بهاشوبات يلا نشوف الطريقة

*بسم الله الرحمن الرحيم*

نقعت الرز والفريكة مدة ساعة كاملة بمي فاترة

حفرت الكوسا بس خليتو شوي سميك مو متل حفر المحشي وغسلتو

جبت الرز والفريكة حطيت عليهن ملح وفلفل واللحمة ومعلقة كبيرة سمنة

حشيت الكوساية نصا بس لانو الفريكة بدا تنفش هي والرز

طبقتن بطنجرة

ودوبت الملح بمي تكفي لتغمر كل الكوسايات وفرطت مكعب ماجي فوقن وحطيت صحن وتقلة بس مو كتير تقلو عليهن شي خفيف المهم تركتن عالغاز العالي لوقت بلشو يغلو بعدين وطيت تحتن

لانو الكمية قليلة مااخدت كتير وقت تلات ارباع ساعة كانو مستويين

طالعتن وصفيت المي منن

للصلصة

حطيت الللبن والتوم والملح خلطتن منيح

صفيت الكوسا بجاط وحطيت اللبن فوقا وزينتو بنعناع ناشف

وهي كانت اكلتي لليوم

اكلة طيبة وخفيفة وباردة بهالجو

جربوا ولاتنسوني من دعوة حلوة متلكن

*والف صحةوهنا*