خلية النحل بعجينتي المعتمدة ملكة الأكلات الاردنية

المقادير

• خمس كاسات طحين
• معلقة كبيرة خميرة
• معلقة صغيرة ملح
• ربع كاسة زيت
• ست معالق سكر
• كاسة حليب دافي
• كاسة ماء دافي
• للحشوة:
• جبنة بيضة

الخطوات

مراحب يا حلوات كيفكم شو اخباراتكم وكيف هالشوبات معكم وهيني ارجعتلكم بعد غياب وعنجد بعتذر عن طول الغياب وكثرة الغياب بس عنجد قلة فضاوة وقتي كلو رايح بين مناسبات وعطلة الولاد بس يلا المهم اني ما بنساكم ودايمآ بتابعكم وما في لاشاردة ولا واردة رايحة علية بطمن عليكم وبروح هههههههههههههه ويلا خلينا بالمهم وخلينا نروح نعجن سوا يلاااااااااااا

اول شي بحط الحليب والماء الدافين مع بعض وبحط عليهم السكر والخميرة وبخلطهم منيح وبحطلهم الزيت وبنخل الطحين والملح وبحطهم ع السوائل وبعجن لحتى تتشكل العجين معي وتصير ملسة واذا حتاجة شوية زيت ضيفيلها شوي حتى ما تدبق وبتركها تخمر من نص ساعة لساعة حسب حرارة الجو وبهالأجواء يمكن بعشر دقايق بتفور وبتعبي الدنيا كمان هههههههههههه الله يرحمنا برحمتو ويجيرنا من نار جهنم

المهم بجهز الجبنة بكون ناقعها وشايلة الملوحة منها بس مش كاملة يعني تكون مناسبة للأكل وممكن اضافة زعتر ورق ع الجبنة او شطة انتي حرة الاختيار وممكن حشوها بأشياء غير الجبنة ممكن بطاطة مسلوقة او لحمة او ممكن كمان حلو متل مربى او تمر او شكولاتة متل ما بتحبي احشيها بس فعلآ العجينة هاي روووووووعة متل القطن بتطلع وبضلها طرية حتى لو باتت لتاني يوم جربوها ودعولي

طبعآ بتتقطع العجينة دوائر كرات وبنحشيها وبنحطها بالصينية وبنريحها شوي وبندخلها الفرن الحامي حتى تتحمر من تحت وبعدين بنحمر الوجة واول ما تطلع من الفرن بعلبة رش المي رشي عليها رش خفيف ع الوجة وغطيها بشقفة نظيفة وشوفو قديش طرية ومتل القطن رح تطلع معكم

او بدهني وجها حليب سائل وبترشي سمسم او قزحة ع الوجة بتعطي لمعة ولون حلو

وبس خلص والله تعبت وانا بكتب لازم تجربوها واشوف تجاربكم بتعليقات الصور تحت عندي وادعموني يلا لشوف ما بدي تقصير من حدا ولا رح ازعل هاااا

ادعولي يا غاليات ولاتنسونا بالايام الفضيلة من دعواتكم الحلوة وربي يكرمكم جميعآ ويتقبل منكم