حلوى او سكاكر قشور البطيخ مارح تصدقوا كثيييير سهلة

المقادير

• قشور بطيخ
• الوان غذائية
• سكر
• نكهات او مغلفات عصير تانج
• عصير ليمون

الخطوات

السلام عليكم ورحمة الله

جبتلكم وصفة بتجنن من قشور البطيخ والنتيجة طلعت اكثر من رائعة واي حدا بذوقها مابصدق انها قشور بطيخ ،، طبعاً استعمالاتها كثيرة ممكن سكاكر للأولاد وممكن تنحط بالكيكات الكيك العادي الكيك المحشي او گزينة لأي نوع حلو بتحبيه وممكن تنحط بقالب كيكة الجلي بديل للفواكة وممكن بكاسات الجلي والمهلبية وانتي وشطارتك ويلا نشوف الطريقة

بسم الله نبدأ……..

أولاً:

بنقوم بإزاله الجزء الاحمر من قشور البطيخ والقشرة الخضراء بنشيلها اما بالسكين او بقشارة البطاطا

ثانياً:

بنفرم القشور مربعات صغيرة ونغمرها بالماء ونسلقها بطنجرة لحتى تتحول لونها للشفاف انا عايرت الوقت بعد الغليان اخذت معي مابين الثلث والنص ساعة وبعد هيك صفيتها من الماء

ثالثاً:

بعد سلق القشور وتصفيتها وحسب كم لون بدي اعمل بنوزع الكمية انا عملت ثلاث الوان الاصفر والاحمر والبرتقالي بنحتاج لكل كاسة قشور بطيخ كاسة سكر مثلاً ثلاث كاسات قشور وثلاث كاسات سكر ولون غذائي مقدار ملعقة صغيرة ومغلف عصير تانج النكهة اللي بتفضلوها بتخلطيهن بملعقة خشبية وع نار هادية مع التحريك بين فترة والثانية وح تلاحظي انه نزلت سوائل من القشور بتعصري نص ليمونه وبتتركيهن لحتى يوصل مستوى السوائل للنص اخذت معي وقت مابين نص ساعة لساعة الا ربع تقريبا المهم تختبري الاستواء بتطلعي بالملعقة وبتنتبهي لأنه بكون كثير ساخن وبتذوقي بحذر اذا حسيتي انه بقوام الفواكة المجففة او سكاكر السوس خلص بتشيليها وبتصفيها من القطر ومباشرة بتفرديها ع شبك او مصفاية واسعة واتركيهن لحتى تنزل كل السوائل منها وتتنشف ويبرد

انا عملت ثلاث نكهات الاحمر نكهة فواكة والاصفر مانجو والبرتقالي برتقال

رابعاً:

بس نتأكد انها بردت عالاخر وهون اذا حسيتي انها مكبتله او ملزقة ببعضها ادهني ايديكي بزيت ذرة وحاولي فككيهن واحفظيهن بمرتبان زجاجي ناشف تماماً داخل الثلاجة

والقطر اللي صفيناه لاتكبيه استخدميه للحلويات هو ملون بس ممكن الاستفادة منه للقشطة بعسل او ليالي لبنان احفظيه بالثلاجة مارح يصير اله اي شيء

وهاي هي وصفتنا البسيطة وياريت تجربوها بجد كثير زاكية وصحة وهنا على قلوبكم