فريكه مفلفله بطعم لا يقاوم وبأسهل الطرق
فريكه مفلفله بطعم لا يقاوم وبأسهل الطرق
المقادير
- نصف كيلو فريكه
- كاستين ونصف مرق دجاج
- ٣ ملاعق كبيره سمنه بلدي
- معلقه كبيره زيت زيتون
- بصله كبيره مفرومه ناعم
- للبهارات:
- ملعقه صغيره فلفل اسود
- نصف ملعقه صغيره بهار مشكل
- نصف ملعقه صغيره هيل مطحون
- رشة جوزة الطيب
- ملح حسب الرغبه وممكن تكتفي بملوحة مرقة الدجاج
- رشه صغييره قرفه
الخطوات
(بسم الله الرحمن الرحيم )
مرحبا كيفكم صبايا بمناسبة عيد الاضحى حابه اعيد عليكم واقلكم كل عام وانتو بألف خير يا رب وينعاد علينا وعليكم بالصحه والعافيه ويتقبل منا ومنكم صالح الاعمال…..
صلو ع النبي المصطفى ويلا نبلش ….
اول شي بتنقعي الفريكه بالمي السخنه لمدة نصف ساعه بس وفي ناس ما بينقعوها بس انا بحب تطلع طريه ومفلفله مزبوط فالمهم…
ع جنب بتحمصي البصل بالسمنه وزيت الزيتون وبعدين بتحطي الفريكه بعد ما تنضفيها وتغسليها منيح وتصفيها من المي وتصوليها اكيد……طبعا عملية التصويل معروفه بس للي حابه تعرف كيف تصولها تكتب بالكومنتات….
وبتحركي الفريكه مع البصل منيح وبتحطي كل البهارات وبتحركي شوي وبتحطي مرق الجاج تكون المي ع قدها وبتغطيها وبتتركيها تغلي لتنشف بعدها بتوطي الغاز ع الاخر وبتغطيها بكيس ابيض نظيف بتاخد معك الفريكه تقريبا ساعه او اكتر حسب ما تشوفيها مستويه معك….وبتقدميها وبتزينيها بالمكسرات وع جنب بتكوني شاويه الجاج بخلطه حسب ما بتحبي وبتحطي ع الوجه او بتحطي الجاج مع الخضره باكياس الفرن ع جنب……
وصحتيين والف عافيه ع قلبكم كتير اكله زاكيه بنصحكم تجربوها وتدعولي….طبعا عملتها عند دار اختي عشان اذا تغير شكل البيت والاغراض عليكم هههههه
واللي حابه تعرف طريقة الجاج اكياس بالفرن موجوده بملفي بالتفاصيل …
انا بعتذر اطلت عليكم بالشرح بس حبيت اوضحلكم اكتر….
بحبكم كلكم….صديقتكم والمحبه لكم على زاكي رؤى الديري..
