معمول سميد لذيذ وسريع وسهل جدا عيدكم مبارك

المقادير

• كيلو سميد وسط ناقص كاسه
• كاسة سميد فرخة (بدل الكاسه يلي شلناها)
• 400 غم سمنة بحرارة الغرفة تقريبا كوبين
• 2 م.ك دقة معمول
• كوب الا ربع حليب سائل
• ربع كوب ماء زهر
• كوب سكر حبيبات
• ربع م.ص خميرة
• للحشوة:
• تمر مطحون
• م.ك سمنة
• م.ك دقة معمول

الخطوات

السلام عليكم ورحمة الله وبركاته

كل عام وانتم بألف خير وتقبل الله الطاعات وحجا مبرورا وسعيا مشكورا وذنبا مغفورا وتجارة لن تبور لحجاج بيت الله الحرام ، ربنا يرجعهم لبلادهم واهلهم سالمين مغفوري الذنب.

عيد يعني معمول ومعمول يعني عيد ، وصفة اليوم معمول السميد عالحلّ يعني سميد فقط بدون طحين خلينا نشوف الطريقة

أولاً/ بسبسة السميد

بنخلط السميد مع السمنه ودقة المعمول وبنبسهم بين ادينا شوي وبنتركهم لثاني يوم.

ثانياً/ عجينة المعمول

ثاني يوم بنعمل خليط من كوب حليب سائل بس انا حطيت ربع الكوب ماء زهر والباقي حليب مع ربع م.ص خميرة مانكثر خميرة مابدنا النقشه تروح. وكوب سكر بنخلطهم سوا منيح وبنضيفهم للسميد وبنقلب بدون عجن بنلتّ الخليط لتّ .

* رح يصير مرق شوي عادي هاد طبيعي.

* اتركي الخليط يرتاح ربع ساعة رح يشرب السوائل .

ثالثاً/التشكيل والخبز

بنكون مجهزين التمر بتعجينه مع سمنة ودقة المعمول وبنعمل منه كرات متناسبه مع حجم القالب.

—بنشكل المعمول وبنخبزه في فرن محمي على اعلى حرارة التحمير بالاول بعدين بنشويه من تحت بيحتاج 8—10 دقائق حسب حرارة فرنك.

*واخييرا بتمنى تكون الوصفة عجبتكم وتجربوها احلى شي فيها سهولتها ومابدها خطوات ومواد . وصحة وهنا

ملااااحظة

الصور الأخيرة للمعمول الخالي من الجلوتين بدقيق خليط من طحين الرز وطحين التبيوكا ونشا الذرة.