الشوكولا الصلبة المنزلية سادة ومحشية وعيدكم مبارك

المقادير

• كوب سكر بودرة جاهز
• كوب الا ربع كاكاو خام نوع جيد
• ربع كوب حليب بودرة
• م.ك نسكافيه بلاك
• 3/4 كوب زيت جوز الهند ممكن استبداله بالسمن يكون نوع جيد.
• للحشوات
• لوز مجروش
• كروكان

الخطوات

الشوكولا الصلبة المنزلية

السلام عليكم ورحمة الله وبركاته

كل عام وانتم بخير وعيدكم مبارك

جربت الشوكولا الصلبة بالبيت بعدة طرق وماكانت تزبط الى ان وصلت للطريقة الصح فحبيت اشارككم فيها.

أولاً/ الخليط

بننخل كل المواد الجافة سوا وبنضيف عليها زيت جوز الهند وبنحرك بالمضرب الشبكي ، وبعدين بنرفعه على حمام مائي مع التقليب المستمر لمدة 7 دقائق. وبعدين بنضربه بالخلاط لحتى نضمن انه ينعم.

*نصيحة*

استخدمي السكر البودرة الجاهز لانه المنزلي بيضل فيه قرشه وما بذوب تماما.

ثانياً/ الحشو

حشيت جزء من الشوكولا بكروكان اللوز ( يلي هوه لوز بينضاف لسكر مكرمل وبس يبرد بنكسره وبنطحنه)

وجزء خلطت معه لوز مجروش وبكل حالاته زاكي.

ثالثاً/التقديم

بنصب الخليط بالقوالب ويفضل قوالب سيليكون لسهولة التعامل معها وعالفريزر ساعتين عالاقل.

—بنطلعه من القوالب وبنقدمه على زوقنا انا ضفت شوكولا بيضا على شكل خطوط بسيطة وتلذذي بالشوكولا مع فنجان قهوة مع من تحبين والف صحة وهنا.

رابعاً/ طريقة الكروكان

بنحط كوب سكر بإناء عالغاز مع ربع كوب مي وبنخليه يذوب على نار هادئة مع عصرة ليمون وبس يغلي بنخليه يضل يغلي عالهدا لحتى يثقل ويتحول لونه للاصفر بنضيف ربع م.ص كربونة وبنحرك رح يفور انتبهي.

—بنكون محمصين كوب لوز او جوز او فول سوداني او بندق اي نوع مكسرات وبنضيفه للكراميل وبنحرك بسرعه وعلى طول بنصبه بصينية او على ورقة زبدة وبنتركه يبرد رح يصير مثل الزجاج يكسر بنكسره او بنطحنه وهيك بكون الكروكان جاهز لأي زينة كيك او حلو او حشو شوكولا طعمه خرافي.