كعك بالطحين ولا اروع عنجد اشي مفتخر وكتير لذيذ
كعك بالطحين ولا اروع عنجد اشي مفتخر وكتير لذيذ
المقادير
- اول اشي يسعد اوقاتكم حبيباتي وكل عام وانتم بألف خير وصحة وسلامة يارب…… بعرف المعايده اجت متأخره بس لجة العيد ما حد غشيم عنها هههه المهم يا حلوات هاي طريقة الكعك عنجد بتجنن بنصحكم تجربوها وانا شخصيا اعتمدتها هي وطريقة خالتو ام علاء الله يجزيها الخير كتير طيبات… يلا نبدأ حبيباتي صلو ع النبي المصطفى وسمو بالله (بسم الله الرحمن الرحيم)
- ٥كوب طحين
- ٢ كوب سميد ناعم
- كوب حليب ناشف
- نص كوب سكر ناعم بودره
- ٤ معالق كبار قزحه
- ٤ معالق كبار سمسم محمص
- ١ ملعقه صغيره محلب مطحون
- نص معلقه صغيره مستكه مطحونه
- كوب ونص سمنه مذابه سائله بدرجة حرارة الغرفه
- كوب زيت زيتون
- نص ملعقه صغيره خميره
- مغلي اليانسون للعجن
- *بهار العجوه:
- م. ك قرفه
- م. ك يانسون مطحون
- م.ك شومر مطحون
- فنجان زيت نباتي
الخطوات
اول اشي حبيباتي بتحطي الطحين والسميد وبهارات العجن (المستكه والمحلب و رشة دقة الكعك) و السكر الباودر والحليب الناشف والسمسم والقزحه وبنحركهم منيح بعديها بتحطي السمنه وزيت الزيتون وبتبسي منيح من فوق لتحت ليتشرب الطحين والسميد كامل السوائل وبتغطي وبتتركي مدة ٦ ساعات اقل شي بس انا صار عندي شغله وتركته يومين تقريبا وما صارلو اشي بالعكس زاد عزه بس ابعدي عن الرطوبه والحراره وغطي وضلك قلبي كل فتره..
بعد ما تتركي ينقع بتغلي اليانسون بكميه وفيره من المي اخد معاي انا كوب كبير وانتو حسب ما تتشكل العجينه معكم حسب نوع الطحين والسميد بتتركي مغلي اليانسون ليصير بحرارة الغرفه مايل للدفئ
بتلمي العجينه لم بأطراف الاصابع وبتحركي من فوق لتحت بخفيه اهم اشي لا تعجني عجن عشان ما تطلع معك العجينه يابسه وبتكملي بهاي الطريقه لتتشكل معك عجينه متماسكه وبتتشكل بتفس الوقت طريه وبعديها بتشكليها مع العجوه بالشكل يلي بتحبي
#يفضل فرك العجينة باليد جيدا قبل البدء بالعمل.
#يفضل البدء بالشغل بعد ٦ساعات و يفضل ترك العجينة ليلة كاملة لنتائج أفضل.
#تضاف الخميرة ثم ماء يانسون ….إعجنيها جيدا….و تترك العجينة ترتاح.
#فرن محمى مسبقا….نار متوسطة….إخبزيه من القاع بلون أشقر ثم تحت الشواية.
واحلى اشي بكعك العيد لمته ولمة الصبايا وروح المساعده يعطيهم العافيه نسوان اخواني ويحفظلهم اولادهم وحبايبهم يا رب ساعدوني كتير وعملت كميتي تقريبا ٣ سدوره كبار
وطبعا احلى اشي كمان بكعك العيد لما نبع الحنان تحط لمساتها وتساعدنا الله يحفظها ويحفظ كل امهات المسلمين ويرحم الاموات منهم….
اسفه اطلت عليكم بس حبيت توصلكم الفكره مزبوط وتجربوه ورح تستمتعو بالطعم متل ما استمتعت…..
مع السلامة حبيباتي معكم صديقتكم على زاكي رؤى الديري ممكن تكون هاي الوصفه اخر وصفه بنزلها بهاي الفتره مشان المدرسه وبدي دعواتكم الي بالنجاح…
