قلب الام

ة الوحام أطول وأصعب وكالعادة النسوان بضل تقول وحام عن وحام بيختلف..ضليت صبر حالي خمس شهور نحفت ودبلت مع انو بالحملين السابقين وردت وفتحت وكنت متل الغزالة..

وبعد ما خلصت هالوحام القاسي مامرء شهر إلا أنا شبه خالصة تعب وتقل على غير العادة..وكل ماشفت وحدة تقلي الصبي حملو أصعب الصبي غير..

كانت الدكتورة اطمني وتقلي الامور ممتازة حملك طبيعي..الصبي عم يكبر

بالمركز الصحي اجت القابلة وخبطت عبطني وقالتلي متوصية في رح يجي ناصح..

كانت ضرتي تغار كتير مني وتكره زوجي يفوت لعندي..كنت ابلعا واسكت بيكفي زوجي بيحبني ومتشوق بيشوف ابني انا عندي بنتين وبهاد الحمل قالولي صبي..

كان عندو زوجي صبيان بس هاد الولد قلبو لاهفلو وكل كم يوم كان يقلي نفسي شوفو وشوف لمين رح يطلع بيشبهني ولا بيشبهك..

ومرت أيام الحمل الصعبة القاسية يلي ماتخيلت مر ابدا فيها..من اول التامن كنت نام شبه قاعدة..

كانت بنتي البكرية اضل اتغنيلي ماما جابت بيبي بيبي حلو صغير..وفرحانة هي واختا لانو رح جبلن بيبي حلو يلعبو معو…

انا بغربة والكل كان ينئ جيبي لهلبنتين صبي منك صحيح عندن اخوان بس اخوهن منك غير بيكون سند الهن ..

فتت بالتاسع وعدى نصو تقريبا رحت زرت الدكتورة وقالتلي امورك منيحة والولد متهيأ لولادة طبيعية وانا اصلا عندي خلفية عن الولادة الطبيعية..

بالاسبوع التالت من الشهر التاسع امي اتصلت فيني وكان الي شي سنتين مو شايفتا قالتلي امي قومي على ادان ضهر يوم الجمعة ضبي شنتة للبيبي وادعي الله يسهل ولادتك..

قمت بلشت ضب الشنتة وانا عم رتب بالاواعي حضنت افرول وبكيييييت اجاني احساس انو مارح يلبسو البيبي..خفت كتير وعملت شنتة تانية طلعتا صدقة عن صحة ابني يلي فجأة قلبي نقزني علي..نور عيوني تعبت في كتيييير وصار نفسي ضمو عصدري وننام جنب بعض وقلو انت تعبتني ياأمي..

بناتي مبسوطين وعم يغنو وزوجي متلهف وضراير يلي بتكيد ويلي بتسكت..

بعد ماخفت كتير على ابني يلي نفسي انا كمان شوفو قعدت ومسكت المصحف وقررت اقرأ على بطني سورة البقرة وبلشت اقرأ واقرأ فجأة بينتفض وبيتحرك حركات غريبة وحسيت كأنو قلب الولد علما انا ماصار معي هيك قبل..

حكيت لزوجي وتاني يوم رحت للدكتورة..قلتلا عن احساسي..قالتلي مستحيل كان متهيأ للطبيعي صعب يقلب كمان حجمو كبير والرحم صغر علي..خليني طمنك..

قعدت عالكرسي وبلشت تعملي ايكو..وشهقت شهقة كبييييرة انا قلبي سلت بين رجلي..قالتلي فعلا كلامك صح الولد قلب صار مقعدي وهاد عملية صعب ينولد طبيعي..فتلت وشي واطلعت عالشاشة شفت وشو كانو عم يضحك شفت عيونو وتمو حسيت انو بدو يخبرني شي..لموت مابنسى هديك الصورة…

الدكتورة خبرتني افتح ملف وجهز حالي لاي طارئ مضو كمان تقريبا عشر ايام وانا حاسة انو راس الولد صخرة عم تخبط بضلوعي..تعبت كتير ومشيت كتير على أمل يرجع يفتل..ليوم اجى المخاض والفضل لله كنت فاتحة ملف بالمشفى الحكومي يلي بدي اولد في..

رحنا وبعد الفحص خبروني انو الولد مقعدي وخايفين ومتوترين من حولي وانا كنت كتير خايفة ومسلمتا لربنا..قلتلن انو انا عندي ملف فرحو وكتبو اسمي وطلعو كان الفجر والدنيا برا كانت حبال حبال الشتى..شافتني دكتورة عم امشي كنت عم استنى يعملو الاجراءات كلا ويصحو الدكتور المقيم ويجهز حالو ليعمل العملية..شافتني جنت وصارت تصرخ بصوت عالي انتي رح تعملينا مصيبة انتي واللي ببطنك..انتي عم تموتي عم تفهمي حتى روب العملية بتلبسي انتي ومتسطحة ممنوع تقعدي حتى عم تموووتي عصبت كتير ومشيت..

فتت غير والبس روب العملية طبعا لبست عالقاعد مارديت عليها. اجت يلي بتنضف الارض اعطيتا شبشبي انتو اكبر قدر وشالي قلتلا خديهن الك قالولي عم موت انتي بتستفيدي منن..

كنت قلقانة والدم ناشف بعروقي وعم اتصبب عرق سحبوني بالتخت المتحرك وكانت الممرضة عم تمسح جبيني ومساعد طبيب التخدير كان يقلي ليش خايفة هالقد شو بدك تسمي ابنك قلتلو عمر..قلي سمي صلاح الدين كونك من دمشق..قلتلو اسمو عمر وضليت ساكتة..وصلنا لغرفة العمليات وكان الدكتور مكشر لانو صحو من النوم واطلع في وسألني عن اسمي..

وفتت خدروني وبعدا رحت بسابع نومة…صحيت على دكتور الو لحية كانو شيخ عم يقلي لابأس عليكي طهور ان شاء الله..

كنت عم اسمع النسوان عم تئن حوالي وانا ولا نفس بس بدي اي خبر عن نور عيوني عمر اي شي ممكن يطمني عنو..ماحسيت بالم عملية يلي كنت اسمع انو بتهد جبال وانو متل تقطيع السكاكين بس تفيقي من البنج..انا بلا احساس..

اهلي ببلد وانا ببلد لا ام لا اخت ولا حدا..

حطوني بغرفة على هالتخت وصارو يلي جنبي وين اهلا باينتا لحالا..ماحدا اجا معا ياحرام..

اعطيت رقم زوجي للي كانت مرافقة مع الوالدة بالتخت جنبي..

اجت حماتي وباست جبيني وفرحانة اني قمت بالسلامة وقالتلي ابنك بالخداج بدي اطلع شوفو..

بعد شوي نزلت لعندي ووشا متغير ولا كأنا هي يلي كانت مبسوطة قبل شوي..

خفت اكتر واتوترت اكتر..

صارت كل شوي تلمحلي انو ممكن يجي الولد بشفة ارنبية او منخار افطس او او او ..

وانا قلبي عم يغلي متل النار..

نادو بالمشفى زوجي وماقدر يجي دغري كان بالشغل اجا عم الولد وشافو وحكى لامو انو هاد الولد النا بتحسي انو من دمنا لانو كانت حماتي عم تقول بدلو ابنا هاد مو لالنا ..

وبعد شوي اجت ممرضة اعطتني ابرة وقالت لحماتي هي بتنيم جمل طبعا انا ماكنت جمل انا جبل اي انا كنت جبل بإذن الله مافي شي بيهدو

مانمت وكنت بس ينقرا علي سورة البقرة نام واول ماتخلص قوم..كنت غرقانة بدمي لانو مافي ام تشوف شو بدي او تهتم فيني كانت الدنيا برد وهوا تلج..

كنت ضل حاول افهم شبو ابني..ماعرفت لاجى زوجي المسى وقلي ابنك اجا مريض وعندو مشاكل انتي جبتي وحش ولازم ماحدا يشوفو ممنوع يطلع برا الباب..حكى مع امو كم كلمة ومشي..انا بهاي اللحظات المباركة الفضيلة العظيمة وكلت امري لله وحسيت ربي متجلي حسيت نور فوق تختي حسيت اني انا باحسن حالاتي مو حاسة بوجع عملية وكانو كل وحدة حكتلي انو اتألمت بعمليتها اعتبرتها كذابة وعم تتغنوج..

رضا نزل على قلبي صبر حب لله امور صعب وصفا .كأني انا وربي بس بالهعالم..

بعتت مسج لزوجي انا راضية بابني ورح حبو ويكبر وحفظو قرآن مارح خبي عن حدا ورح يصير احسن شب بالعالم..

وتاني يوم بدن يطلعوني وابني ضل بالخداع طبعا كل ماتغفى عيني احلم انو في ولد بحضني واصحى ابكي انو انا رح اطلع وابني رح يضل بالمشفى..

فاتت الصبح الدكتورة يلي بهدلتني بالطوارئ واعتذرت مني كتير وقالتلي اني كنت مخطرة كتير..سألتا عن عمر قالتلي هاد ابنك وضلت ماشية..ماردت بكلمة

طبعا قررت انو اطلع شوفو وبوسو قبل ماامشي عالبيت..

الدكاترة منعو كتير خافو علي انصدم..بس مارديت ضليت طالعة للخداج واترجيت كتير لممرضة كأنا اجتني من السما فوتتني واخدتني لابني قالتلي قربي علي حسسي على راسي خلي يحس فيكي..قربت كان ابيض متل التلج وشعرو اسود متل الليل عيونو مغمضة شبهتو بالقطة الصغيرة..قرأت علي المعوذات والكرسي وبستو واستودعتو الله..

رجعت عبيتي مكسور خاطري بدون ابني انا ابني ماعم يعرف يرضع وانا كان بقدر حطو عصدري..

ضل يومين وبعدين اتصلو فينا وقالولنا تعو خدو بلش يرضع..انبسطت انو قطعة مني رح ترجعلي..وصيت على شوكولا مشان بس يجيبو قول لبناتي هاد من اخوكن..

جابتلي حماتي وكانت خايفة علي كتير كانو هاد اول ابن الها..كانو قالولا انت عاقر وحصلت معجزة وخلفت..شفتا فرحانة وجابتلي يا مع هدية ونقوط حطتو بحضني حاولت رضعو كان صعب كتير..

مسحتلو عيونو يلي كلهم دم كان من غير جفون ومنخارو افطس وشفتو ارنبية..الكل تركني ومشي بعد مواساة ..حتى بنتي الصغيرة خافت منو..

اما بنتي الاكبر ماخافت منو وباستو كان عمرها خمس سنين حضنتني حسيتا امي لانو عنجد كنت بحاجة امي..

كان متوسخ ومو لابس منيح..سبحان الله الافرول يلي بكيت وحسيت انو مارح يلبسو فعلا مالبسو بالمشفى ولما اجى عالبيت طلع الافرول صغير لانو ابني اجى قريب الخمسة كيلو..

المهم مسحتلو ولبستو وعطرتو وقلت مابنيمو الا عم يوج وج..

حطيتو بحضني وصرت ادعي الم نجعل له عينين ولسانا وشفتين وضليت ردد الاية ورضى من الله..

الصبح جبنالو رضاعة صناعية وبلشنا نشربو شوي فيها وشوي بالقطارة كان سقف حلقو كتير عالي..وبلشت عاصفة اسمها اليكسا وقضينا ايام التلج اخر حب ورضى ودلال اجت حماتي قبل العاصفة بيوم وجايبة جهاز بيلبس خمس اولاد..واجت ودللت عمر وحبتو وتسهر طول الليل في وكأنو انخلق عمر لينحب الكل حبو

وانا كنت ضل ادعي والقيت عليك محبة مني ولتصنع على عيني..

قضيت التلجة فاتحة شباك الغرفة عم اتفرج عالتلج وادعي لهالولد..

اجت بنتي الكبيرة من فرحتا فيني انا واخوا ومشان تثبتلي انو هي بتحبو رسمت عمر على ورقة ورسمت قلب حب طبعا عمر احلى بكتير من الرسمة عنجد ضحكتني وقالتلي يارب كل الناس يموتو ويضل عمر تعبيرا عن حبها الو.ههه طبعا قلت بقلبي الله لا يقدر ..

بعد ماخلص التلج وداب بلشنا نشوف شو قصة عمر وشو هو مرضو..

متلازمة جولدن هار وبلشنا بعلاجو رممولو جفونو وعملو اكتر من شغلة حسنت من شكلو..

ومع الايام كبر حب عمر بقلوب الناس كان في مناوشات كتيرة بيني وبين حبيبة عمر حماتي..

وعمليات ولنتظار وخوف وامل بالله ويقين انو يلي بيصبر وبيرضى ربنا بيرضي..

قالولنا لامشب ولا بيحكي ومعو رخاوة…

الدعاء والامل بالله غيرو القدر..

عمر مشي وحكى وماشاء الله علي بيتعلم وعم يكبر كل شبر بندر..

وهلئ صار عندو كمان اخ بيموت علي وبيحبو ودعيت يكونو سند لبعض ويارب يستجيب دعائنا ويضلو سند كل الاخوى مع بعضن..

وصار عمر عمرو ست سنوات..ولسا بانتظار الكثير من العمليات والكثير من الامل بالله..

دعواتكم لعمر ولكل طفل مريض..لكل أم بتحب اولادها وبضل تدعيلهن..

لكل أم حملت وصبرت وتحملت وجابهت..

دعواتكم إلي لاجتمع بأمي واحكيلا قصتي

لبناتي الحناين يبعتلن ايام حلوة وكل اخواتن مني ومن ابوهن

وبإذن الله تعالى ياجبل مايهزك ريح..تمت بالصلاة على نبينا محمد