الحلقوم التركي عالأصول طعم بياخدك لقلب اسطنبول

المقادير

• القياس بنفس الكوب:
• 4 كوب سكر مقسوم نصفين
• 3 كوب ماء
• 1 كوب نشا
• نصف م.ص ملح ليمون مقسوم قسمين
• م.ص مستكه مطحونة
• 2 م.ك ماء زهر
• كوب فستق حلبي محمص
• م.ك سمنه او زبدة
• كمية من النشا لتغبير الحلقوم بعد ان يجهز.

الخطوات

السلام عليكم ورحمة الله وبركاته

بعمري ما حبيت الحلقوم ولا استسغت طعمه إلا لحتى زرت اسطنبول وذقت الحلقوم التركي بأشكاله وانواعه ونكهاته يلي بتاخد العقل ، وقتها ادركت انه كل يلي كنت مفكرته حلقوم طلع شيء ثاني بعيد كل البعد عن الحلقوم التركي الأصلي. وتعلمت طريقته وجربتها وطلعت اكثر من رائعة للصراحة تستحق الجهد والصبر الطويل بلاش اطول عليكم خلينا نشوف الطريقة.

أولاً/ خلينا نتعرف بصورة عامه عالمكونات

1— عنا 4 كوب سكر مقسومين كل كاستين رح نستخدمهم لحال.

2— عنا نصف م.ص ملح ليمون مقسوم نصفين رح نستخدم كل نصف لحال

3— عنا ماء 3 كوب مقسوم كوبين وكوب رح نستخدم كل قسم لحال.( كوبين للقطر وكوب للنشا)

4—المنكهات المستكه وماء الزهر رح نستخدمهم بالاخر

5—ارجو التركيز والانتباه لطريقة العمل لإنها أهم من المقادير وهيه سبب نجاح الحلقوم.

ثانياً/ طبخ الحلقوم

بنحط في طنجرة كوبين ماء وكوبين سكر ونصف كمية ملح ليمون يعني ربع م.ص وبنحرك عالنار المتوسطة لحتى يذوب السكر ويبدأ القطر يغلي بنوطي الغاز وبنصب محلول مكون من كوب نشا وكوب ماء مخلوطين كويس وبنزلهم مثل الخيط عالقطر مع التحريك المستمر وبنرفع النار لاقل من الوسط وبنحرك لحتى يثخن الخليط وهون بنضيف كمية ملح ليمون الثانيه وبنستمر بالتحريك وبنعاير عشر دقائق مع التحريك بملعقة خشب واستبعاد مضرب الشبك

—بعد مرور عشر دقايق رح تلاحظي انه الخليط تحول من اللون الأبيض للون الشفاف وثخن قوامه أكثر. ولو ميّلتي الطنجرة بنزل معك كتله وحدة.

—بنبدأ نضيف كوبين السكر بالتدريج على 4 الى 5 دفعات وكل ما نحط سكر بنحرك لحتى يختفي تماما وبنحط اللي بعده وهكذا.

—هون رح نرجع نعاير 35 دقيقة مع التحريك المستمر وقبل انتهاء المدة بخمس دقائق بنضيف المنكهات ملعقتين ماء زهر او ورد وملعقة صغيرة مستكة مطحونة وبنتابع التحريك لحتى تخلص المدة.

— بنجيب الفستق الحلبي المحمص وبعد التحميص بنضيفله ملعقة سمنة وبنحركه وبنتركه يبرد ( جهزيه قبل البدء بالعمل)

—بنضيف الفستق وبنقلب بعيدا عن النار وعلى طول بنفرغه على نايلون تغليف طعام مدهون زيت او بلاستيك مدهون زيت وبتشكليه زي مابدك ممكن رولات ممكن بشكل مسطح المهم انتبهي لإنه حار جدا.

—وبنغطيه برضه بنايلون وبنتركه يبرد 4—5 ساعات برا الثلاجة بس اذا الجو حار جدا عندك حطيه بالثلاجة.

ملاااحظة

الشكل يلي رح تعمليه عليه وهو ساخن رح يضل عليه بعد مايبرد يعني الرول اذا ما انتبهتي انه يكون مزبوط ومشدود رح يسيح من الكيس ويصير مسطح ويجمد وهو مسطح فانتبهي للتشكيل.

ثالثاً/ التقطيع

بعد مايبرد بنغبره بالنشا لمنع الالتصاق وبنزيل بقايا النشا وبنلفه كمان مرة بنايلون وبنقطع وهو ملفوف عشان يعطيكي تقطيعه مرتبه ومستقيمه. ولشكل المربعات غبري السكين بالنشا عند التقطيع او بالزيت.

رابعاً/ عوامل ونصائح لنجاح الحلقوم

1— اتباع الطريقة بدقة لإنه الطريقة أهم من المقادير.

2—لا تبالغي بكمية ملح الليمون بيطلع حامض

3—لا تختصري مدة الطبخ بيطلع طري وما بيعلك بالفم.

4— الصبر ثم الصبر والاستمرار بالتحريك

5—استخدمي ملعقة خشب بعد ما يثخن خليط النشا بالبداية.

6—جهزي الفستق ونايلون التغليف المدهون زيت قبل البدء بالعمل اريحلك واحسن.

7—استخدمي نفس الكوب لقياس كل المواد

نصييييحة مهمة

استخدمي ملعقة خشب ايدها مستديرة بشكل اسطواني ما تكون اليد مسطحة او مستطيلة لانه استخدمت هالنوع ولحتى كملت مدة التحريك كان طالع باصبعي فقاقيع منها .

فحبيت انبهك عشان مايصير معك مثلي.

خامساً/ التقديم

قدمي الحلقوم مع فنجان قهوة مع من تحبين واستمتعي بمذاق فاخر ورائع جدا. ومين ما ذاقه رح يسألك عن الطريقة.

—كنت حابه اعمل الحلقوم يلي بنكهة الرمان ولكن ماكان متوفر رمان احمر عندي بس هوه من اكثر انواع الحلقوم زكاوة رائع جدا واذا توفر عندي رمان احمر رح ارجع اعمل حلقوم بالرمان وانشرها ان شاء الله.

—بتمنى من كل قلبي تجربوها كثير زاكيه وتستحق التجربة وتستحق العناء. وصحة وهنا مقدماً