كيكة إسفنجية (جاتو) بطريقة سهلة جداً

المقادير

• كوبين إلا ربع طحين
• ربع كوب كاكاو خام
• عشر حبات بيض بحرارة الغرفة
• كاسة سكر مطحون
• ملعقة صغيرة بيكنغ باودر
• ملعقتين كبار ڤانيلا باودر
• عصير ليمونه
• برش ليمونه
• ملعقة خل ابيض
• رشة ملح صغيرة

الخطوات

السلام عليكم ورحمة الله وبركاته

الكيكة الاسفنجية أو الجاتو بطريقة سهلة جداً وماتخافوا من كمية البيض بإذن الله مارح يطلع طعمة زناخة وعملتها وكنت حاطة احتمال 99% انه مارح اقدر اذوقها عشان كمية البيض ومع ذلك حبيت أغامر و اجربها وطلعت روووعة مثل جاتو المحلات بالزبط بتمنى تجربوها وبإذن الله رح تعجبكم.

انا عملتها هون بالكاكاو واذا بدكم تعملوها بنكهة ڤانيلا استبدلو كمية الكاكاو بكمية طحين .

بسم الله نبدأ ….

أولاً:

نضع البيض وكاسة السكر المطحون ورشة ملح بوعاء كبير او خفاقة الكيك ونبدأ بالخفق على سرعة متوسطة مدة 3 دقائق وبعدها نزيد لأعلى سرعة حتى يصير قوام البيض مثل قوام الكريمة ورح يتضاعف حجمه كثير مدة الخفق مش أقل من ربع ساعه وممكن اكثر حسب سرعة الخفاقة وحجمها.

ثانياً:

نخلط كل من الطحين والكاكاو والبيكنغ باودر والڤانيلا وننخل الخليط اقل شي ثلاث مرات.

ثالثاً:

نضيف الطحين المنخول على مارينج البيض على ثلاث دفعات ويكون الخلط من الأسفل للأعلى وبكل لطف مابدنا الهوا يطلع من الخليط وبس يختفي الطحين بنرجع نضيف ونخلط حتى انتهاء الكمية

بعدها بنضيف برش الليمون وعصير الليمون وملعقة الخل كمان بكل لطف وعلى دفعتين والخلط يكون من اسفل الى اعلى ضروري جداً نلتزم بطريقة الخلط .

رابعاً:

نحمي الفرن على حرارة 180 ونغلف القالب بالزيت والطحين المخلوط بالكاكاو ونضع الخليط بالقالب ونقوم بتفريغ فقاعات الهواء عن طريق ضرب القالب بالارض بشكل خفيف مقدار ضربتين وبعدها عالرف الوسط بالفرن وبعد مرور عشر دقائق نوطي للحرارة ل 160 درجة ونتركها مدة ربع ساعة يعني مجموع الوقت تقريبا مابين 20 دقيقة ل 25 دقيقة بعدها اختبري استواءها بغرز سكين بوسط الكيكة اذا طلعت معك نضيفة بتكون استوت بطفي الفرن وبتركها مدة 5 دقائق بالفرن وبعدها بطلعها ونضعها على شبك حتى تبرد تماماً .

خامساً:

بعد ماتبرد الكيكة نقسمها ونبدأ بحشوها وتزيينها بالكريمة المخفوقة او الشكولاته او كريمة الزبدة حسب مابتحبو وصحة وألف عافية عالجميع بتمنى تجربوها وتعطوني رأيكم بكل صراحة مع تحياتي لكم جميعاً أختكم

أم جيلان