صابونة البقدونس سلسلة وصفات الجمال 1 ملكة الإبداع

المقادير

• صابونة جليسرين وزن 1 كغم بتلاقوها متوفرة عن العطار
• 2 ضمتين بقدونس
• كاسة ماء ورد
• 4 ملاعق عسل
• 4 ملاعق حليب بودرة
• 4 ملاعق نشا
• كبسولتين ڤيتامين e (اختياري)
• ملعقة من زيت الخزامى (اللافندر) او اي زيت عطري مناسب
• كحول طبي

الخطوات

السلام عليكم ورحمة الله وبركاته

حبيت اقدملكم طريقة صنع صابونة البقدونس بالبيت وبطريقة مضمونة مية بالمية لأني جربت اعملها بتطبيق وصفة عن اليوتيوب بس مازبطت معي من اول مرة حسيتها طرية ورجعت عدلت عليها وظلت طرية شوي مش كثير بالمرة الثالثة ولله الحمد زبطت المقادير وطلعت معي روووعة وبالقوام المطلوب طبعاً مابنسى اختي وصديقتي ام نزار لأنها كثير ساعدتني بمشورتها وتعبتها معي بكثرة اسألتي ربي يجزيها الخير ويرزقها من حيث لاتحتسب.

بالنسبة للطريقة هي كالتالي:

أولاً:

نغسل البقدونس ونتركه يتصفى شوي من الماء ونفرمه فرم ناعم. ونضعه بالخلاط مع كاسة ماء الورد ونطحن حتى نحصل على خليط ناعم جداً بعدها نضيف الحليب والنشا والعسل ونرجع نخلط حتى يتجانس الخليط تماماً.

ثانياً:

نقوم بتقطيع الصابونة ووضعها على نار هادية حتى تذوب. وبنفس الوقت نضع خليط البقدونس على نار هادية مع التحريك المستمر حتى يثقل الخليط بنطفي تحته.

ثالثاً:

بعد ما تذوب الصابونة بنخلط معها خليط البقدونس رح تلاحظو انه بالبداية تكتل بس باستخدام المضرب اليدوي بنخلط جيداً وبشكل سريع حتي تختفي التكتلات تماماً. نخلط ملعقة من زيت الخزامى مع محتوى كبسولات ڤيتامين e (نقوم بقص طرف الكبسولة بمقص ونفرغ الزيت الموجود بداخلها فوق زيت الخزامى)جانباً ونضيفها عالخليط ونحرك حتى يختلطو المكونات جيداً

رابعاً:

نقوم بوضع الصابون بقوالب سيلكون صغيرة وبنرش رشة كحول طبي على وجه الصابون عشان نتخلص من الفقاعات ونتركه ينشف ويتماسك مدة يوم كامل وبعدها بنشيله من القوالب ونضعه على صينية مناسبة او شبك ونتركه ينشف لمدة يوم كامل وبس ينشف بنقوم بتغليفه بنايلون تغليف الطعام.

فوائد صابونة البقدونس للبشرة

تنظف البشرة بعمق.

تفتح البشرة وتبيضها وتعطيها مظهراً ناعماً.

تغذي البشرة وتخلصها من البقع الداكنة والنمش والكلف.

تقضي على البكتيريا.

والاهم انها صابونة طبيعية خالية من اي مواد كيماوية وتناسب جميع انواع البشرة

بتمنى تجربوها وان شاء الله رح تعجبكم تحياتي

أم جيلان