سر لمعان وبريق الزجاجيات وكأنها جديدة بدون جلاية الصحون ملكة الإبداع

المقادير

• زجاجيات
• ماء مفلتر
• خل

الخطوات

السلام عليكم ورحمة الله وبركاته

حبيت اشاركم بطريقة تلميع الزجاجيات بدون تعب وتنشيف وبدون جلاية ، خاصة انه نحنا ستات البيوت بننتبه على كل شي ، يعني لو اجتنا ضيافة بكاسة محوّرة كلس إلا ما ننتقد حتى لو بينا وبين حالنا ، فهاي طريقة اكتشفتها بمجهود شخصي بحت وطبقتها من زمان ونتيجتها راااااائعة بكل معنى الكلمة.

الطريقة بكل بساطة انه عملية تشطيف الكاسات والزجاجيات عموماً تكون بالماء المفلتر ، رح تحكوا هو احنا بنشتري مي معدنية عشان نرميها بالجلي ! بحكيلكم لا الموضوع ما بياخد كمية ماء رح تشوفوا بالصور شوية مي بجاط ليوم كامل ما بتأثر احنا هيك هيك عنا المي المفلترة اتوقع وبعد استعمالها بنسقي فيها الزرعات ، اكيد بتكونوا زرعتوا ببيوتكم بعد وصفات ام سارة الرائعة للزراعة.

*الخل بيعطي الكاسات لمعة أخّاذة وكأنها جديدة.

* التشطيف بماء المفلتر بعد التشطيف بماء الحنفية عشان ما تتلوث المي بالصابون.

*اتركي الكاسات تجف لحالها لا تغلبي حالك وتنشفي بالفوطة ورح تتفاجأي من اللمعان والنظافة.

* بتمنى اكون افدت اي حد ، وانا متأكده انه اغلبكم بتغلب بالتنشيف وبهالطريقة رح ترتاحوا.

دمتم بكل خير