ورق عنب والطعم رهيب ملكة الابداع
ورق عنب والطعم رهيب ملكة الابداع
المقادير
- كيلو أرز قصير الحبه
- دجاج حسب الحاجه
- كميه من ورق العنب
- ملح
- فلفل أسود
- كاري
- بهارات
- شرائح بندوره
- شرائح بصل
- صلصة بندوره اختياري
- زيت قلي
- لخلطة الارز:
- زيت زيتون
الخطوات
السلاام عليكم ..ويسعد اوقاتكم بكل خير
اليوم حبيت اقدملكم طريقتي بطبخ ورق العنب
بما انه المسابقه عن الابداع فاكيد ما بتخلى من وصفه لورق العنب لانه طعمه كله ابداع الا تجهيزاته ما فيها ابداع فيها تعب بس بلبقله التعب لانه طبخه لذيذه جدا
كلكم شيفات متقنات ومبدعات واكيد كلكم بتعرفو طريقته بس حبيت اشارك طريقتي ان شاء الله تعجبكم
يلااا نشوف الطريقه سوااا …
& اول شي بالنسبه لورق العنب عملت كمية بطريقة الضغط بالمرتبان طريقه جدا راائعه وبتوفرلي مكان بالفريزر وبضل سنين ما بيجيها شي وطعمته روعه ولونه اروع اذا انضغط مزبوط وطلعنا منه الهوا مزبوط بضل سنين ما بصيرله شي
& الطريقه : بنطلع الورق من المرتبان وبنفرده واول ورقه بتكون عالوجه بنشيلها ما بنستخدمها افضل
بنكون مسخنين مي عالغاز ولما تبلش تغلي بنسلق الورق فيها ما بنطول عليه كثير لما نشوفه طري بنطلعه عالمصفايه وهيك الورق جاهز معنا
& الدجاج : بعد تنظيفه وتصفايته بنقليه تحمير خفيف
بنضع بقاع الطنجره شرائح بصل وبندوره
وشرائح ليمون اصفر بس انا ما كان فيه عندي .وبعدين بنضع الدجاج فوقهم وبنرشلهم رشة ملح وفلفل اسود
& الأرز : بعد نقعه وتصفايته ..بضعله ملح وفلفل اسود وكاري وبهارات وزيت وبنخلطهم سوا ..
طبعا البهارات حسب يلي بتفضلوها
وطبعا ممكن اضافة اللحمه المفرومه المقليه بس انا ما كان عندي فاستثنيتها
& وهيك الورق والارز والطنجره صارو جاهزين وبنبلش نلف الورق والله المستعان وبنصفهم بالطنجره
انا لفيتهم قبل بيوم احسن ووضعتهم بالثلاجه
& الطبخ : بسخن مقدار من المي وبضعله نص بكيت صلصة بندوره اختياري انا بحب نكهتها عالورق ..
وممكن اضافة ماجي لتعزيز النكهه اختياري كمان
وبعد ما تسخن المي بضيفها عالورق بس بدون ما أغمر الورق بخليه مبين وقبل ما اضيفله المي بكون رشيتله رشة ملح ورشة فلفل اسود وبضيفله زيت قلي
& بضعه عالنار عاليه وبحطله جاط عالوجه الورق عشان ما يتفتح معي .. بعد الغليان بربع ساعه تقريبا بوطي النار لاخر شي وبتركه يستوي عالراحته ..تقريبا باخذ وقت من ساعتين ونص لثلاث ساعات عشان يطلع ذايب ذوب
& بعد ما يستوي تماما بطفي النار وبضيفله عصرة ليمونه ومع زيت زيتون ليعطيه حموضه ولمعان وبتركه يرتاح عشر دقايق
وهيك وصفتنا صارت جاهزه معنا وبنقدمها
ولا الذ من هيك طعم رهيب
ان شاء الله تنال اعجابكم ..كلكم مبدعات وفنانات
اقبلو مني مشاركتي بمسابقة الابداع
لكم مني جزيل الشكر ..بتمنالكم الخير جميعا ..
