رنة خلخالك

منقووووووولة

من يومين سمعت صوت جوزي عالباب جاي بكير ، فورا” شلفت جوالي ع مكان بعيد عني حتى خليه يشعر انو الجوال آخر اهتماماتي

ضبيت كبّاشي ورا أدنيي وقرصت خدودي ، وفات عالبيت مبسوط ، قلي تعي تعي مرتي جبتلك هدية

قلّي عمضي عيونك دقيقة ، تيررررااارراااا يله فتحي عيونك

قلتلو : ياااااي خلخال دهب بأجراس لك شو خطرلك هيك ومافي مناسبة

قلي مو ضروري يكون في مناسبة ، جبتو مشان بس تمشي قدامي يرقص قلبي على رنة #خلخالك

أنا طار عقلي من الفرحة

ضليت كل نهار لابسته وهوي مبسووووووووط

لحد ما انا فتت عالمطبخ وحسيت أنه شوي الخلخال عملي تحسس ف شلتو .

ولما فتت هالغرفة جوزي فوراً تلبّك وخبّى الموبايل ، وقلي يا مرتي لك وين الخلخال شلحتيه

قلتلك مشان #قلبي_يرقص_على_رنة_خلخالك

أنا ما استنضفت القصة ، ليش هيك تلبك وخبى الجوال ؟!

أنا لحالي فهمت انو جبلي الخلخال كرمال يحس عليي وصلت لعندو ويخفي تطبيقاته عالشات مع أبصر مين

أنا ما حسسته أني انتبهت ، بس صفّرت لكل أباليس الدنيا تقعد جنبي واستعملت كيدي يلي مخليته للأوقات العصيبة

بلشت إبكي إبكي قلي شبك حبيبتي ، قطعتي قلبي

قلتلو انا ما بستاهل شي ولا بستاهل هدية ، أنا زعلانة على قلبك ما بقى يرقص على رنة خلخالي

الخلخال وأنا بتحمم فات ببلوعة الحمام

أصلا انتا جايبو قد الفرتوكة وفورا” فات خرم البلوعة ما قدرت لحقه

سكت وقلي ولا يهمك يا روحي هلق بروح بجبلك واحد أتقل منه وعيار 21 ولعيونك

ما كذب خبر ب نص ساعة كان جايبلي واحد أكبر واحلى وأغلى وجراسه أكبر ..

ولبسته وكل ما فوت هالغرفة بلاقيه مزبط أموره وتارك الجوال

#المهم_انسولي_الحكي_يلي_فوق

هلق جوزي بعد ما إجا من صلاة الجمعة

وسمعت صوت مفاتيح الباب ،

ركضت لعندووو غمضت عيونه وقلتلو بدي فرجيك شغلة حبيبي ، تيرررررراررراااا يله فتح عيونك

بس فتح عمل هيك قلي شو هاد

قلتلو حبيبي الخلخال عملي تحسس برجليي ، بعد ما لقيت الخلخال القديم ، رحت لعند الصايغ وبدلت الخلخالين مع شوية المصاري يلي بالخزانة وجبت جنزير دهب على رقبتي بالله بالله عليك مو هاد أحلى وأتقل

وأسفة لأني خليت #جيبتك_ترقص_على_رنة_إفلاسك

بس يالله مابعرف ليش لهلق ماراضي يتغدى وعامل جواله وضع طيران

(أم النصر)

#عزيزتي_الزوجة_لاتستنضفي_هدية_بلا_مناسبة

#لأنهم_وقت_المناسبة_اصلا_ناسيين