طريقتي لخزن طريقتين من الزيتون الأخضر رائع والطعم ولا أزكى

المقادير

• ال٦ كيلو زيتون بنحتاج:
• نصف كيلو ملح عادي
• كوب عصير ليمون
• كاسه شاي (خل عنب أبيض)
• فلفل أخضر مقطع شرائح حسب الرغبه
• بيضه (للعيار)
• ماء

الخطوات

بسم الله نبدأ

بما إنه موسم الزيتون حبيت أفرجيكو طريقتي إلي بعملها من سنين والحمد لله كتير ناجحه والكل بشكر فيه

بالبداية بغسل الزيتون كويس من الغبره وبشيل كل الورق والأعواد إلي فيه بتركه على جنب

الطريقه الأولى:

بقاع المرطبان بحط شرائح فلفل وبعدين زيتون لما أوصل للنص بحط كمان فلفل بكمل باقي المرطبان زيتون وبالأخر بحط طبقه فلفل

الطريقه الثانيه:

نفس الخطوات بس الفرق إنه الزيتون دقيته بالهون جبت الهون وبالدقاقه ضربته ضربه خفيفه بس لتنفتح الحبه من النص وكملت باقي الخطوات

لمحلول الملح:

أنا بعاير بالأول الميه بالمرطبان بإنه بعبي المرطبان ميه وبخليه ناقص إشويه بعمل حساب الخل والليمون

عبيت المرطبانات بميه وخليتهم ناقصين إشويه

صبيت الميه بوعاء كبير وضفت الملح وحركت كويس لما داب حطيت البيضه بالنص لما ظهرت البيضه على قد عمله نقديه وسط هيك عرفت إنها تمام أو بطريقه تانيه بإنك تحطي ملح وتحركي لحتى يبطل يدوب الملح هيك بكون خلص تمام بعدين ضفت الخل والليمون بالاخر لو حطيتهم بالأول مع الملح الملح مش راح يدوب وحركت كويس

صبيت المحلول على الزيتون لعبيت المرطبانات عالأخر سكرتهم كويس وحطيتهم برف بالمطبخ يكون معتم إشويه

المرطبان إلي مش مدقوق بده تقريبا من شهر لشهر ونص وبكون إستوا

أما إلي مش مدقوق بده تقريبا من شهرين ل٣ شهور

وهي طريقتي بتمنا تعجبكو وتدعولي بالخير والعافيه

♡وصحه وعافيه بحبكم أنا ♡