طريقة كبس الزيتون المشطب بلش موسم الزيتون

المقادير

• كمية من الزيتون ممكن الاسود وممكن الاخضر
• ملح
• ليمون
• فلفل اخضر حار
• زيت زيتون

الخطوات

السلام عليكم ..ويسعد أوقاتكم بكل خير

بما انه بلشنا بموسم الزيتون حبيت انزللكم طريقتي بعمل الزيتون المشطب الاسود او الاخضر وان شاء الله بتفيدكم الطريقه ..طيبه وزااكيه كثير ..

ويلاا نشوف الطريقه …

& انا الزيتون يلي عندي محتفظ فيه من موسم الزيتون الماضي ..بحفظه بمي وملح بمرتبان او قلان بامكانك تحتفظي فيه بدون ما تكبسيه بالزيت في حال كان زايد عندك كمية وحبيتي تخليها لوقت الحاجه وهالطريقه رائعه ومضمونه وبضل الزيتون مثل ما هو ..

طبعا بتحفظيه بمي وملح وهو مشطب وممكن يكون اسود وممكن يكون اخضر ..يلي عملته انا كان مخلط فيه اخضر واسود بس فتح لونه مع التخليل ..وفيه الزيتون الحبه الكبيره هو المعتاد عليه للتشطيب وللكبس بالزيت يلي استخدمته انا حبته صغيره كثيير زاكي بالزيت جربوه واكيد راح يعجبكم

انا بحتاج احفظه بمي وملح لوقت الحاجه بحكم ظرف السفر … فالطريقه يلي راح اقدمها اليوم بتنفع لكبس الزيتون بوقته او اذا حبيتي تحفظيه لوقت الحاجه

الطريقه الاولى :

اول شي بفرغ الزيتون من القلن او المرتبان وبغسله وبصفيه وبعد ما يتصفى من المي بضيفله كميه من الملح يلي يتملح مزبوط وبخليه بالمصفايه عشان يتصفى ويتشرب الملح

& بعدين بنحتاج ليمون اصفر وفلفل اخضر حار

بنقطعهم لقطع صغيره ..وبضيف كم حبة فلفل بدون تقطيع

بخلطهم مع الزيتون وبعصر عليهم حبة ليمون او ممكن اكثر حسب كمية الزيتون ..وبعد ما اخلطهم سوا بعبيهم بالمرتبان وبغمرهم بزيت الزيتون

وكم يوم وبكون جاهز معنا للاكل

الطريقه الثانيه :

اما اذا كان زيتون طازج ..بنشطبه وبنحفظه بمرتبان مغمور بالمي لعدة ايام لحتى يطلع المرار منه ممكن تكون المده لعشر ايام او اقل او اكثر حسب ما انتو بتحبو حلاوته وحسب الزيتون المستخدم ..وبتم تغير المي عنه مره او مرتين ..وبعد ما تخلص المده بصفيه من المي وممكن تخليله وكبسه مثل ما وضحت قبل

وممكن اذا كنتو حابينه يتنشف مزبوط من المي بنرشله رشة ملح كويسه وبننشره بالشمس ليومين

الطريقه الثالثه لمحبي الزيتون الاسود الناشف بدون مي

بنشطب الزيتون الاسود وبنغسله وبنصفيه وبرشه بالملح وبننشره بالشمس مع التقليب كل يوم وباخذ وقت لشهر وممكن لاسبوعين تقريبا لحتى ينشف مزبوط وممكن اقل حسب كمية الزيتون بعد ما يتنشف مزبوط بغسله وبكبسه بالليمون والفلفل الحار والزيت

فيه خيار ثاني انه من بعد ما ينشف فيه ناس بتضيفه بمي ساخنه لحتى يرجع ينتعش وبعدين بكبسوه

& ملاحظه : لبس كفوف المطبخ عشان الفلفل الحار ما يأذيكم

ان شاء الله اكون فدتكم بالطرق الثلاث ويكونو واضحين

دمتم بكل الخير