جاتوو الشوكولاتة أحلى من الجاهز وب 2 بيض فقط

المقادير

• 1 وثلاث أرباع كوب طحين ابيض
• كوب ونصف سكر
• ثلاث أرباع كوب كاكاو خام
• كوب حليب سائل
• كوب ماء يغلي
• م. ك بيكينج باودر
• م. ك فانيلا
• م. ص ونص كربونة
• م. ص ملح
• نصف كوب زيت ذرة
• 2 بيض
• صوص بديل نوتيلا موجود عندي بالملف طريقته أو بقناتي على يوتيوب تحت اسم شوكولا دهن.

الخطوات

السلام عليكم ورحمة الله وبركاته

كيفكم جميعا بعتذر عالغياب بس انشغلت شوي بافتتاح قناة اليوتيوب زي ما بتعرفوا بتاخد وقت وبعدها انقطعت من النت وهيني رجعت ومعي حلوان افتتاح القناة ههههه

أحلى جاتو وأزكى من الجاهز غرقان بالشوكولاته

وطري وهش بشكل مش معقول خلينا نشوف الطريقة.

أولاً/ خليط الكيك

بنخلط كل المواد الجافة عدا الفانيلا وبتَنخلطها كويس وبعدين بنضيف البيض والزيت والفانيلا والحليب وبنخفقها كويس واخر شي بنضيف كوب ماء ساخن بيغلي وبنخفق مزبوط.

ملاحظة/ مش شرط نستخدم خفاقة كهرباء الخفاقة اليدوية بتزبط.

ثانياً / الخبز

بنصب الخليط بصينية واسعة ومستطيلة مبطنة وبنخبزه بفرن محمي على 180 لمدة 15_20 دقيقة وبنختبر الاستواء بعود خشب كالعادة.

ثالثاً /التزيين

بنترك الكيكة تبرد وبعدين بنقطعها ثلاث قطع متساوية وبنرتبهم فوق بعض وببن كل طبقة والثانية بندهن شوكولا دهن واخر طبقة لنكثر الشوكولا شوي وبنعمل فيها تموجات ونتوئات بتخليها احلى.

رابعاً /التقديم

بنبرّدها بالثلاجة قبل التقديم واذا كانت النتوئات على الشوكولاته رايحة ارجعي اعمليها.

_ بتتقطع مستطيلات وبتتقدم ولا اروع ولا ازكى وضيافة فاخرة صراحة وبتبيض الوجه.

_بتمنى تكون عجبتكم وتجربوها وتعطوني رأيكم والف صحة وهنا.

الوصفة عملياً على قناتي على يوتيوب

( أشهى الأكلات وأحلى الأفكار)

شرفوني ولا تنسوا الاشتراك والإعجاب