أصابع البطاطا عالطريقة الهندية من سلسلة “وصفات حول العالم ” 12

المقادير

• 3 حبات بطاطا متوسطة الحجم
• 3 ملاعق ك سميد ناعم
• 3 ملاعق ك ماء
• ملعقة زيت ك
• 3 ملاعق بقدونس مفروم ناعم
• أوراق الكاري مفروم ناعم ان وجدت (بعرف انو مارح تنوجد هههههه) الهنود بحطو أوراق الكاري ونحنا منبدل عالبقدونس هههههه
• البهارات:
• نصف ملعقة ك ملح
• رشة فلفل اسود
• ربع ملعقة كبيرة من البابريكا والكزبرة اليابسة المطحونة والكاري والكمون
• للتغطية منحتاج:
• نصف كوب طحين
• ملعقة نشا

الخطوات

“بسم الله الرحمن الرحيم”

* أول شي رح نسلق البطاطا وبعدين منقشرها ومنهرسها وهية دافية أسهل

* تاني شي رح نحط المي مع الزيت عالغاز وأول مايبلشو يغلو منزل عليهم السميد ومنحرك ليتشرب السميد السوائل

منشيلو ومنفتتو فوق البطاطا ومنضيف عليهم البهارات والبقدونس (المايدونس) عقولة الأتراك هههه

* هلأ بقى بعد ماتبرد هالعجينة وندوقها شي عشرطعشر مرة بحجة انو عم نشوف البهارات مناخد شوي ومنشكلها عشكل اصبع رفيع وطويل ل لنخلص الكمية مندخلهم الفريزر حوالي نص ساعة أو ساعة

* بعد التجميد منغلفهم بخليط التغطية ومنقلي بزيت حامييييي ليتشقرو

فرمااااان والحاضر يعلم الغايب

السميد للقرمشة اللذيذة والتفريز وحرارة الزيت العالية ضروريين لحتى ماتفتح البطاطا عالقلي

وعزيمتي طبعا مفروغ منها الا اذا عندكن اعتراض ههههههه

وهيك بتكون خلصت وصفتنا

ان شاء الله تجربوها وتعجبكم انتو واطفالكم ولا تنسوني من دعواتكم الحلوة

ماعم اشبع حكي معكم بس حاجتكم اليوم ههههه

بحبكم كتير وأستودعكم الله