صينية بطاطا بالدجاج
صينية بطاطا بالدجاج
المقادير
- شرائح بطاطا
- شرائح باذنجان
- شرائح بندورة
- بصل جوانح
- ضرسين ثوم مدقوق
- بازيلا وجزر اختياري
- بهارات مشكلة
- فلفل اسود
- دجاج
- ماجي
الخطوات
السلام عليكم ورحمة الله وبركاته
كيفكم صبايا حبيت اعرفكم بحالي اول شي
انا الاء من الاردن جرش تحديدا عمري ٣٢ سنة وعندي ولدين رغيد و براء
المهم بنبلش بسلق الدجاج ….وهي اهم خطوة بالنسبة الي انا اول شي بقطع بصل وضرس ثومة وفلفل حار وبحوسهم مع زيت وبهارات وفلفل اسود وحب هال وورق غار على الغاز بعدين بحط عليهم الدجاج وبحوسهم مع بعض ١٠ دقايق تقريبا بدون اضافة مي بعدين بضيف ملح وماجي …. بحب الجاج يوخذ طعم البهارات والبصل قبل السلق …. بعدين بضيف مي وبغطيه حتى يستوي الدجاج
في صينية بحوس البصل الجوانح مع ضرسين الثوم ورشة ملح ورشة بهار رشة فلفل اسود
مرات بحط معهم شوية بازيلا وجزر يلي بيحب
بعد ما يذبل البصل شوي بسفط فوقهم شرائح الباذنجان ( ني ) وشرائح البطاطا برضه ني وشرائح البندورة مرات ما بحط بندورة ولا بازيلا وجزر ازا بدي اعملها بزعتر اوريغانو متل يلي بالصورة الاولى
بسفط الدجاج على الصينية وبغمرها مرقة دجاج وبقصدرها وبحطها بالفرن لحين الاستواء
بس تستوي بحمرها
وصحتين وعافية ❤
