الدجاج بالكاري بطريقتي المميزة بنكهة مارح تنسوها ملكة الشتاء

المقادير

• منحتاج
• كيلو صدور دجاج مقطع مكعبات كبيرة شوي
• ملعقة صغيرة خل ليطري الجاج
• بصلتين وسط مقطعين جوانح صغيرة شوي
• شوية زيت
• ملعقة زبدة
• ملعقتين طحين
• ملعقة ونصف أو ملعقتين دبس بندورة حسب كثافة الدبس
• كوبين ونصف حليب
• كوب ماء
• رشة بقدونس
• البهارات:
• ملح
• رشة فلفل اسود
• ربع ملعقة هيل
• ربع ملعقة قرفة
• نصف ملعقة بابريكا حارة أو حسب الرغبة
• ملعقتين كاري

الخطوات

&بسم الله الرحمن الرحيم&

* أول شي رح نحمس البصل بالزيت والزبدة لحتى يدبل وبعدا منضيف عليه الجاج وملعقة الخل ومنقلبهم شوي ليصير الجاج أبيض ومنغطيهم لحتى يقرب يستوي

* هلأ منضيف البهارات ومنقلبهم مع الجاج منيح وبعدا منضيف الطحين كمان منقلبهم رح نلاقي انو الطحين امتص السوائل

* منضيف الحليب ومنحرك لحتى يبلش كل شي يتمازج سوا ويغلو مع بعض

* منحل دبس البندورة بكوب الماء ومنضيفهم عالطنجرة ومنحرك ومنغطيها ومنترك كل شي يغلي مع بعضو شي ربع ساعة ليتسبك كل شي تمام بتصير جاهزة للسكب وفوقها رشة بقدونس يممم

وشغلولي حاسة الشم وشوفولي هالروايح

فشر غوتشي يطالع هالمزيج ههههه

* استخدام الطنجرة المانعة للالتصاق أسهل بما انو في طحين بالسوس

* أم عمرو تعي سناولي من ايدي هالملعقة ودوقيلي الطبخة وانتبهي من أم لمى ماتاخدلك ياها وانتي أم علي الجليات من حصتك اليوم هههههه

* بتتقدم مع رز بسمتي أبيض بالقرنفل

والصلصة اللي بتزيد (اذا زاد) جربو عملو فيها معكرونة طعمتها بتبكي من الفرح ههههه

بتمنى تكون الوصفة عجبتكم وتجربوها وتدعولي بالبركة وبكل شي حلو متلكم يا أحلى أخوات..

~ بحبكم كتير ~