كفتة بجميع الانواع من الوءة ملكة الشتاء

المقادير

• لحمة الكفتة :
• لحمة مفرومة ناعم
• بقدونس
• بصل
• ضرسين ثوم
• فلفل اخضر حار
• ملح
• رشة بهارات
• للكفتة بخضار بتحتاجي:
• بطاطا مقلية
• باذنجان مقلي
• فليفلة مقليه
• بندورة
• بصل شرائح
• للكفتة بلبن بتحتاجي:
• بطاطا مكعبات صغيرة مقلية
• لبن رايب مفور على الغاز
• للكفتة ببندورة بتحتاجي:
• شرائح بندورة
• معلقة صلصة
• للكفتة بطحينية بتحتاجي:
• بطاطا شرائح مدورة مقلية
• طحينية
• عصير ليمونة

الخطوات

مسى الخيرات صبايا كيف الحال ….بدي اعتذر مرة تانية اني ما برد على تعليقاتكم الحلوة على وصفاتي المتواضعة جدا بالنسبة لشيفات زاكي المبدعات

بس والله بكون مرات كتير تعبانة اعذروني

طيب خلينا نبلش

لحمة الكفتة بنحط كل المكونات مع بعض وبنعجن الكفتة بشوية زيت زيتون وبنعجنهم منيح

للكفتة بلبن انا بعمله مع رز …. زي اول صورة بكور الكفتة كور صغيرة وبقطع بطاطا مكعبات صغيرة وبقليها بحط الكفتة بصينية مع شوية زيت وبقلبها حتى تتشوح ويتغير لونها وبحط عليها كاسة مي وبغطيها لحتى تغلي بس تستوي بحط البطاطا بخليها تغلي غلوتين وبعدين بضيف اللبن يلي بكون مفوريته على الغاز متل لبن المنسف وبخليه يتسبك شوي …. وبعدين صحتين وعافية

بالنسبة للكفتة بخضار بكون مقليه الخضار كلها الا البندورة وبكون عاملة الكفتة كباب وبصير اسفط فيه كباب بعدين بطاطا بعدين باذنجان وبعدين بصل بعدين فليفلة ممكن تحطي او تستغني عن اي خضار بضيف عليه كاسة مي ورشة فلفل اسود ورشة بهارات وبغطيه حتى يستوي وعلى الفرن وصحتين وعافية

والكفته بطحينية بكون مكبكبة الكفتة وحاطيتها على الغاز مع شوية زيت حتى يتغير لونها وبعدين بضيف كاسة مي ورشة فلفل ورشة بهارات وبغطيه حتى يستوي نص سوية بعدين بضيف البطاطا المقلية بالشكل يلي بتحبيه وبغطيه حتى يستوي

بهاي الاثناء بالخلاط بكون حاطة كاسة مي سخنة و٥ ملاعق طحينية او حسب كمية الكفتة وضرس ثومة وعصير ليمونة وبخلطهم وبضيفهم على الكفتة وما بغطيها حتى ما تفرط الطحينية بخليهم شي ٥ دقايق على الغاز بعدين على الفرن حتى يتحمرو وصحتين وعافية

وكفتة البندورة بفرد الكفتة بصينية او بكبكبها متل ما بتحبي بخليها على الغاز مع كاسة مي ورشة فلفل ورشة بهار وشوية زيت لحتى تستوي نص سوية بعدين بضيف عليها شرائح البندورة وملعقة او ملعقتين صلصة مذوبة بشوية مي وبغطيها حتى تستوي بعدين على الفرن وصحتين وعافية