حمصيص أكلة فلسطينية ملكة الشتاء
حمصيص أكلة فلسطينية ملكة الشتاء
المقادير
- نص كيلو عدس حب (اسمر)
- ٢كيلو عشبة الحمصيص (الحميض)
- فنجان زيت زيتون طازج
- م ك كمون مطحون
- ملح
- ثوم
- عصير ليمونتين
الخطوات
السلام عليكم ورحمة الله وبركاته
اليوم جبتلكم أكلة تراثية قديمة من فلسطين وتحديدا من غزة
وهي أكلة شتوية معروفة كتير بغزة
يمكن كتير أشخاص مابعرفها هالاكلة رغم بساطتها الا أنها مفيدة كتيييير ولذيذة كتير
الحمصيص هي نبتة تمتاز بطعم حموضتها
ومن فوائد نبتة الحمصيص، أنها تعتبر من مضادات الأورام والسرطانات وهي ملين قوي للجهاز الهضمي ومدرة للبول، وتعتبر من أهم الأعشاب المدرة للبول ومن منظفات الكلى من السموم وهو محلل قوي للغازات ويزيل تشنجات القولون، والحمصيص غنية جداً بالفيتامينات والمعادن، أهمها الحديد الذي يعمل على تقوية الدم.
بتمني تنال إعجابكم
بنبلش ببسم الله الرحمن الرحيم
والصلاة والسلام علي سيدنا محمد وعلي آله وصحبه اجمعين
بالبداية بنقي العدس وبغسله منيح وبحطه بطنجرة فيها مية مغلية وبتركه علي النار لبين مايستوي
وبهاد الوقت بنقي الحمصيص وبغسله كتير منيح
وكمان بجهز الدقة يلي بدي احطها وهي عبارة عن( ثوم وكمون وملح وليمونتين )
بس يستوي العدس كتير منيح ببلش انزل عشبة الحمصيص وانا بحرك
وبنزل بالدقة وزيت الزيتون
وبس يستوي الحمصيص كتير منيح بذوقها اذا لازمها ملح بزيد ملح واذا لازمها حموضة بزيد عصير ليمون
بطفي عليه وهيك بنكون خلصنا يسلم ايدي ويعطيني العافية
عند التقديم يوضع زيت زيتون علي الوجه
ويقدم مع الخبز المحمص والزيتون الطازج والفلفل الاخضر او الفلفل الاحمر
حسب الرغبة
وصحة وعافية يارب
لا تنسوا الدعاء بالرحمة والمغفرة للغالي ابوي الله يرحمه
بحبكم كتييييييييييييييير كتييييييييييييير
