وصفة الكفته بطحينيه
وصفة الكفته بطحينيه
المقادير
- المقادير وحسب كمية اللحمه :
- لحمة كفته
- كوب طحينيه
- كوب لبن
- كوب ماء
- ثلث كوب عصير ليمون تقريبا
- ملح
- زيت قلي
- لخلطة اللحمه:
- بقدونس مفروم ناعم
- راس بصل مفروم ناعم او مبروش
- حبتين بندوره مفروم ناعم او مبروشه
- معلقتين من صلصة البندوره
- معلقتين دبس رمان
- ملح
- فلفل اسود
الخطوات
السلام عليكم ..ويسعد أوقاتكم بكل خير يا رب
اليوم بقدملكم وصفة الكفته بطحينيه جدااا لذيذه
وحلو التنويع بالاكل ..انا بعملها وبقدم معها رز بجنبها
بس هالمره حبيت اعملها بدون ارز
عملتها تغميس بالخبز والصراحه طلعت لذيذه
وقدمت معها كباب مشوي
ان شاء الله بتعجبكم
يلاااا نشوف الطريقه ….
& اول شي بجهز لحمة الكفته بضيفلها بقدونس وبصل وبندوره وفلفل حار مفرومين ناعم عالمحضره
وبضيفلها دبس رمان وصلصة بندوره وملح وفلفل اسود فقط ..وبخلطها مزبوط
(طبعا اذا حبيتو تضيفولها بهارات فهادا ذوق شخصي لكم الخيار بأضافة اي شي بتحبو اضافته )
& بكورها لكور صغيره وبقليها لحتى تتحمر او بشويها
بتركها بعد التحمير عالجنب لحتى احضر صوص الطحينيه
(ممكن مدها بالصينيه بدون تكوير وتحميرها بالفرن )
& لصوص الطحينيه بنحتاج كوب طحينه بخلطه مزبوط مع كوب لبن وبعدين بضيفله تقريبا ثلث كوب ليمون
(كمية الليمون طبعا حسب كمية الطحينيه ..فممكن تحتاجو اكثر ليمون )…ورشة ملح وبخلطهم مزبوط وببدأ باضافة كوب مي تدريجيا واخلط لحتى اوصل للقوام يلي بدي اياه بكون صوص رخو شوي لانها راح تشد معي بالفرن
وبعد ما اجهز الطحينيه بضيفها عالكفته وبدخلها الفرن عالحراره عاليه لحتى تبلش تغلي بوطي النار للوسط وبتركها تتسبك ..ولما تجهز بحمرها واذا حبيتو بدون تحمير بزبط كمان
وهيك وصفتنا صارت جاهزه بسيطه وطيبه
بقدمها مع الخبز والسلطه
وصحه وعافيه مقدما
