صينية دجاج بالفرن …ازكى عشوة
صينية دجاج بالفرن …ازكى عشوة
المقادير
- دجاجة واحدة
- ٣ حبات بصل متوسطة الحجم
- ٣ حبات بطاطا متوسطة الحجم
- بهارات
- ملح
- حبة ليمون كبيرة
- زيت زيتون
- كاسة مي كبيرة
الخطوات
السلام عليكم جميعا …يا شيفات زاكي الطيبات هاي أول وصفة بنزلها على زاكي وبتمنى ما تكون آخر وصفة
اول شي بجيب الجاجة وبنيمها بالصحن بس اوعكم تغنولها أغنية ما قبل النوم بعدين بتاخد حرام وبتنام وإحنا ما بدنا إياها تنام بدنا إياها جاجة مصحصحة منيح وإزا حسيتوها بدها تغفى الجاجة أفركوها بالملح والليمون يعني رشو عليها ملح وأعصروا حبة اليمون كلها عليها ودخلو الملح تحت الجلد وقطعوا حبة الليمون مع قشرها على الجاجة وانا متأكدة انها الجاجة رح تقوم تركض مش رح تصحصح بس شريرة انا صح ..الغرض من الملح والليمون إني انضف الجاجة منيح من ريحة الزنخة وبخليها لمدة ساعة كمية الملح لتنضيفالجاجة ملعقتين ملح كبار ……
الخطوة التانية بقشر البصل وبقطعه قمار خميلة شوي
وبعدين بجيب البطاطا وبقطعها دوائر رفيعة وبحضرهم عشان احطهم عالجاجة …..
بعد ساعة بجيب الجاجة وبحممها منيح منيح بالمي …يعني دووووش مرتب الله يرضى عليكي يا نور أحمد مرة قرأت بوصفة من وصفاتها انها بتعمل للجاجة مغطس….
المهم بنضف الجاجة منيح منيح من الملح والليمون وبعدين بحط على الجاجة البهارات الي أنتي بتحبيها انا حطيت بهار دجاج وبهار وفلفل أسود بس ما كترت يعني نص ملعقة صغيرة من كل نوع من البهارات …..
وبعدين بنبطحها للجاجة بالصينية وبنوزع عليها البصل والبطاطا وبنغطيها بالبطاطا وبنرش ملح وشوية بهارات بس ما تكتروا بهارات على البطاطا يعني على الوجه وبعدين بحط زيت زيتون وكاسة مي كبيرة عليها وبغطي الصينية بورق الألمنيوم وبحطها بالفرن لمدة ساعة كاملة على درجة حرارة ١٨٠ درجة بس بعد ما تغلي بضلكم تفقدوها بلاش تنسوها …..
بعدين طلعوها من الفرن وإدعولي …بس ما تنسوا انه لازم يضل فيها شوية مرقة بقاع الصينية مش زاكية تكون ناشفة كتير ….وبالهنا وألف صحة وعافية للجميع …
حابة اشكر جميع شيفات زاكي وسلامي لكل صبية نزلت وصفة بزاكي لكل صبية قرأت وصفتها وسلامي لكل صبية أخدت منها لو معلومة صغيرة ….وسلامي لكل صبية بجروب صبايا الوطن العربي
وأمانة انكم تدعو لهديل ربي يفرج همها ويبعد عنها كل مكروه ويعطيها الصحة والعافية ويصبرها امانة لكل وحدة بتقرأ الوصفة تدعي لهديل ……
شكر خاص للآدمن تمار على هالبرنامج الرائع والمفيد لكل ست بيت من ناحية المطبخ لتنظيف البيت للناحية الدينية لناحية تربية الأبناء للنصائح الي بنقدمها لبعض وكمان ما ننسى التسلية ….الله يجزيكم الخير جميعا
