طريقة لف وطبخ ورق السلق الاخضر

المقادير

• ضمتين ورق سلق اخضر او اكثر
• نص كيلو ارز
• لحمه مفرومه
• ملعقه صغيره ملح او اكثر حسب الرغبه
• ملعقة صغيره فلفل اسود
• رشة بهار
• حبة بندوره مفرمه ناعم
• بقدونس نفروم
• فنجان صغير زيت نباتي
• راس بصل صغير مفروم ناعم
• لعمل السلطه:
• عصب السلق مسلوق ومفروم ناعم
• معلقتين طحينه
• سنين توم
• عصير ليمون
• رشة ملح

الخطوات

بسم الله نبدا

يسعد اوقاتكم صبايا كيفكم ان شاء الله الجميع بخير….بعتذر عن انقطاع وصفاتي عنكم بسبب الظروف وحبيت اطمن عليكم جميعا من خلال هالوصفه البسيطه والسهله

تعالو نشوف مع بعض طريقة عمل ملفوف ورق السلق

اول شي بنغسل ورق السلق لانه بكون كله اتربه وبنتركه يتصفى على المصفى وبعدها بنقوم بفصل الورقه عن الساق وبنحتفظ بالساق لعمل السلطه الخاصه بهذه الاكله وبنرتب الورق حتى ما نتغلب اثناء لفه

نقوم بتسخين الماء وقبل ان تغلي نضع الورق لمده ثواني فقط يعني لو طولنا شوي بنتغلب بلفه يختلف عن ورق العنب والملفوف لانه ورقته ناعمه وبتتلف اذا طولنا عليها وبنكون محضرين جاط فيه مي بارده وبنضع فيه الورق المسلوق لانه الحراره الموجوده بالورق بعد سلقه ممكن انها تتلفه لانه رقيق جدا وبعد ما ننتهي من سلق الورق بنسلق الاضلاع او العصب هذا بتحمل حراره لو طولتي عليه لازم يكون نضج

طبعا بنكون ناقعين الارز وبنحضر الحشوه الي كلكم بتعرفوها للمحاشي وبنبلش لف مثل ما هو موجود بالصوره وبعد ما ننتهي نن اللف لازم نضع اي شي بقاع الطنجره اما من نفس العصب تبع السلق او بطاطا متل ما بتحبي لانه الورقه ناعمه وبلاش تخسري اخر طبقه احتمال تنشعط منك وعند الطبخ بنرش ملعقه ملح صغيره على صغيره على وجه الطنجره مع قليل من الزيت وبنغمرها بالشوربه او الماء وبنولع عليها الغاز على العالي وبعد ما تغلي بنوطي الغاز شوي وبنتابعها حت تنضج والف صحه وهنا

طريقة عمل السلطه من اضلاع او عصب السلق…..

اول شي بنفرم السلق ناعم بعد ما نسلقه وبنضيفله معلقتين طحينه وعصير ليمون وسنين توم مهروسين ورشة ملح وقليل من الماء رح تطلع معك اشهى سلطه لهذه الاكله اخوانا اللبنانين لا يمكن ياكلو لف ورق السلق الا مع هذه السلطه

والف صحه وهنا يا حلوين جربوها اذا بتقدور ما رح تخسروشي اهم شي طريقه السلق بالمي

الف صحه وهنا سامحوني على الاطاله حبيت اقدملكم كل شي بالتفصيل

استودعتكم لله الذي لا تضيع ودائعه