جبنة مثلثات رائعة بناء على طلب الأخت مهوش ولأي حدا حابب يجرب ويوفر ههههه

المقادير

• منحتاج لخليط الجبنة:
• كوب حليب
• ملعقتين كبار نشا
• ملعقتين زبدة (حصرا زبدة لنعومة القوام)
• ملعقة قشطة (ممكن استبدالها بنصف ملعقة زبدة لو ماتوفرت هي بس للنكهة)
• 4 ملاعق اي نوع جبنة دهن او مثلثات
• ربع كوب زيت
• ملعقة ك خل
• ربع ملعقة صغيرة ملح

الخطوات

“بسم الله الرحمن الرحيم”

* أول شي منخلي مكوناتنا بدرجة حرارة الغرفة

* بكل بساطة منحط كلللل شي عالخلاط ومنضربن منيييييح ليمتزج كل شي مع بعضو بدون تكتلات

* منصب الخليط بالمصفاية على طنجرة لنضمن عدم وجود أي حبيبات

* منشغل النار تحت الطنجرة وتكون قوية شوي لأنو مابدنا نطول عالنار وأهم شي نحرك باستمراااار مابدنا يعلق شي بالطنجرة

* وخلص بس تغلي ثواني ومنطفي ومنحرك ومنصب الخليط بأي علب او جاط مبطن بورق الزبدة لأنو صحي أكتر من النايلون

* منغطيها ومنتركها بالبراد لترتاح وتتماسك

بتحتاج حوالي 3 أو 4 ساعات وبعدا بتكون جااااهزة للنمنمنمنممممممم

****** ملاحظااااااااات ننوشية ******

& جبنتنا الحلوة مافيها مواد حافظة صناعية

حطيت الخل ليساعدنا نحفظها

وبتضل بالبراد ما أحلاها ضمن علبة مغطاة لمدة أقصاها أسبوع

& بإمكاننا نستخدمها بأي شي متلها متل الجبنة اللي منشتريها من برا

يعني حلويات أومعجنات او شو مابتحبو..

بآخر صورة انا مستخدمة هالجبنة بخلية النحل وطعمها ولا ألذ والله

حتى الحجي تبعي كان مفكرني مستخدمة الجبنة الجاهزة قبل ما انطق بجوهرتي وانفش ريشي وقلو انو هالخلية اللذيذة صنعي من برا ومن جوا ههههه

& الكمية بتطلع ممتازة (انا شايلة شوية زوايد من الأطراف لما طالعتن من القوالب) فانتو أول مرة ماتجربو أكتر من المقادير اللي حاطتن بيطلع عندكن كتير جبنة هههه

وبالنهاية بتمنى من قلبي تجربوها وتعجبكن وتدعولي بالبركة وبالدعوات الحلوة متل قلوبكن وسامحوني عالإطالة ورداتي..