منسف بلادي
منسف بلادي
المقادير
- كل المقادير حسب عدد العائله:
- لحمه الافضل خروف مش لحم عجل
- بصله
- ورق غار
- ملح
- هيل (بهار)
- قهوه
- زيت ذره
- ارز قصير الحبه
- كركم
- سمنه بلديه اذا كاتت موجوده
- جميد لبن
الخطوات
السلام عليكم ورحمة الله وبركاته عزيزاتي وخواتي يااااويلها مني اللي رح تكتبلي تعليق سيء رح اكلها لالا رح ارد عليها
طبعا المنسف اكله تراثيه اردنيه اساسياتها ثابته مابسير نغير بمكوناتها ع كيفنا ممكن نبدل اللحمه بالدجاج والجميد باللبن والشنينه
اول شي الجميد اللي عندي طري لذلك قسمته. او بنبرشه وبننقعه بمي سخنه ربع ساعه
لو كان الجميد قاسي لازم ننقعه قبل بليله لااازم
وانا بعثت صورته للخوات اللي مابيعرفوه
بنسلق اللحمه وبنضيف ورق الغار والهيل والبصله المقطعه بدووون اي نوع ثاني من البهارات.. حتى ماتتغير الطعمه
بنيجي للخلاط بنخلط الجميد واللبن وبنغليه وبنضيف شوية كركم
بس تستوي اللحمه بنضيفها للبن وبنزيد مية لحمه حسب الحاجه
ولازم يتطبخو سوا لاازم..
هون. ممكن نضيف معلقة السمنه البلديه. وفي ناس بتطبخ اللحمه مع اللبن ع طول بيزبط
بنطبخ الرز بالطريقه العاديه ممكن بالزيت وممكن بالسمنه. ولازم يكون قصير الحبه
الرز البسمتي مابيشرب اللبن
وبنضيف للرز شوية كركم بلاش يسير اصفر كثير
بس تستوي الطبخه بنخط رغيف شراك بالسدر وبنشربه بمعلقه كبيره
وممكن مانضيف خبز
بنحط الرز واللحمه وبنزين بالبقدونس واي نوع مكسرات زي اللوز او الفول السوداني(الفستق)
طول عمرنا بنعمل المنسف باساسياته مابنضيف ع كيفنا اي شي
بنقدم جنبه شرائح بصل وجرجير..
ممكن اختلف معكم بالطريقه. بس هاي اكثر طريقة متعارف عليها عنا
يلا همتكم… ابعثولي صور المنسف من عمايل ايديكم…
خلونا نحافظ ع هيبته للمنسف. ليضل متصدر يوم الجمعه بقووه
ودمتم سالمين
