لزاقيات حورانية عالاصووول

المقادير

• كوبين طحين
• 3 أكواب ونصف ماء
• ملعقة فانيلا
• ملعقتين حليب بودرة ويمكن الاستغناء عنو
• رشة ملح صغيرة
• جوز مفروم
• جوز الهند
• سكر
• نصف كوب زيت زيتون مخلوط مع نصف كوب سمن عربي او اي نوع سمن بتحبيه

الخطوات

اول شي للعجينة منخلط الطحين والمي والفانيلا والملح والحليب بكاس الخلاط الكهربائي او بالمضرب اليدوي (انا بفضل بالكهربائي عشان ما يتكتل عنا شي ) لازم يكون الخليط مو سائل كتير ولا ثقيل

يعني اخف من عجينة ال بان كيك

ثانيا منسخن مقلاة التيفال او الصينية (يفضل تيفال او اي نوع تاني ما يلزق افضل) لتصير سخنة صح ومنضيف مقدار صغير من الخليط بالمقلاية (بفنجان قهوة مثلا) ومنوزعو بكامل الصينية بتحريكها بشكل دائري ليتوزع بكامل الصنية على نار وسط طبعا

وبس تستوي من تحت منقلبها عالجهة التانية لتتحمر شوي صغيرة بس

هيك بتكون جاهزة .منحطها بصحن التقديم وفورا مندهنا بخليط الزيت والسمن ومنرش سكر وجوز الهند وبعدا جوز (لازم هالخطوة عالسريع منشان وهو لرغيف سخن يدوب السكر )

ومنرجع منعمل العجينة بالصينية متل قبل وبنفس الخطوات هيك ليصير عنا مو اقل من 10 طبقات وبكل طبقة مندهنا ومنرشا بالجوز والسكر وجوز الهند

وبس تشوفي انو صار طبقات كفاية حوالي 14 طبقة انا بعمل

قطعيها مربعات وقدميها ولا اطيب من هيك عنجد خرافية

انا لازم كل اسبوع اعملها ما بمل منها من كتر مو طيبة