ششبرك
ششبرك
المقادير
- العجين:
- 4 كاسات طحين
- رشة ملح
- كاسة زيت قلي
- ماء حسب حاجة العجين
- الحشوة:
- لحمة مفرومة
- ثوم مفروم
- بصل مفروم
- معلقة قرفة مطحون
- معلقة كاري مطحون
- معلقة سمن بلدي اذا توفر
- ثوم مهروس
- كزبرة خضرة
الخطوات
السلام عليكم ورحمة الله وبركاته
يسعد أوقاتكم عزيزاتي بكل خير ومحبة معطرة برائحة الياسمين
نبدأ ببسم الله
اول شي حضرت العجين مثل ما هي واضحة بالمقادير لحتى حصلت على عجينة طرية وجاهزة للرق.
ثم قليت اللحمة وصفيت عنها ميتها وبعدين ضفت البصل والثوم السمن والبهارات وقلبتهم نص ساعه لحتى جهزت.
انا عندي قالب للششبرك اشتغلت عليه لأنو أسرع والصور بتوضح كيف استعملتو وبعد ما جهزو معي حمرت العجين بالفرن.
قبل بيوم كنت ناقعه جميد وبعد ما ذاب خلطتو بمخيض عالخلاط ليتجانسو مع بعض.
غليت اللبن عالنار وضفتلو معلقة سمن بلدي وثوم مهروس وحبات الششبرك وخليتهم يغلو شي 15 دقيقة وبعد ما جهزت ضفت كزبرة خضرة مفرومة بلبن وزينت الوجه بالوز والكزبرة.
هيك صارت جاهزة مع صحن رز بالشعيرية
إن شاء الله كون فدتكم وسهلت عليكم طريقة الششبرك.
اتمنى تعجبكم وتحبوها ودمتم بخير وصحة وسعادة.
