كرات الشوفان بنكهة القهوة حلا سويدي رائع من سلسلة “وصفات حول العالم” 15

المقادير

• ملعقتين كبار نسكافيه مدوبين ب 3 ملاعق كبيرة ماء
• 4 ملاعق ك سكر بني او ابيض
• 3 ملاعق ونصف كاكاو بودرة
• 6 ملاعق زيت جوز الهند أو زبدة
• ظرف فانيليا
• ملعقتين جوز هند
• رشة ملح
• كوبين رقائق الشوفان (ثلاث ارباع كوب صحيح وكوب وربع مطحون شبه ناعم)
• المقدار الأخير اللي هو البسكويت اختياري يا اما منحط بدالو شوفان يا اما بسكويت متل ماعملت انا لاني لقيتها بالبسكويت أطيب
• بسكويت دايجستف مطحون شبه ناعم (منحتاج حوالي كوب او ليصير عنا خليط متماسك خرج يتشكل)

الخطوات

“بسم الله الرحمن الرحيم”

* أول شي منقلب الشوفان تقليبتين تلاتة عالغاز مشان ينشف شوي ومنشيلو عجنب

* هلأ بوعاء تاني منخلط النسكافيه مع المي ومنضيف عليها السكر ومنحرك ليدوب السكر منضيف الكاكاو ومنحرك ليمتزج منيح ومايضل عنا أي تكتلات

* منضيف جوز الهند والزبدة ومنخلط منييييح لتمتزج الزبدة تمام

* منضيف الشوفان الكامل والمطحون واذا حبيتو البسكويت ومنخلط لنحصل على خليط قابل للتشكيل

* بس نوصل لخليط متماسك منشكل كرات ومندخلهن البراد شوي وبعدين منطالعهم منغطهم بجوز الهند ومنقدمهم مع القهوة ومنستمتع بألذ حلا

* وللي مابحبو القهوة مع اني بشك لاقي حدا مابحبها فيكن تستغنو عن النسكافيه وتخلوها بس مع الشوكولاتة

وبهييييييك بتكون وصفتنا خلصت اليوم ولا تنسو تعزموني عالقهوة الصباحية اذا عملتو هالحلو ههههه

بحبكن كتير وبتمنى تجربوه ويعجبكن وتدعولي